മുല്ലപ്പെരിയാര്‍ ജലത്തിലൂടെ തമിഴ്നാട് കൊയ്യുന്നത് കോടികള്‍

തിരുവനന്തപുരം: അതി൪ത്തികടന്ന് കിഴക്കോട്ട് ഒഴുകുന്ന മുല്ലപ്പെരിയാ൪ ജലത്തിലൂടെ തമിഴ്നാട് കൊയ്യുന്നത് കോടികൾ. അഞ്ച് ജില്ലകളിലെ രണ്ടു ലക്ഷത്തിലേറെ ഏക്കറിൽ ജലസേചനം നടത്തുന്നതിന് പുറമെ വൈദ്യുതിയും ഉൽപാദിപ്പിക്കുന്നു. 15.65 ടി.എം.സി അടിയാണ് (ആയിരം ദശലക്ഷം ഘനയടി) മുല്ലപ്പെരിയാ൪ അണക്കെട്ടിൻെറ ശേഷിയെങ്കിലും പ്രതിവ൪ഷം 21.5 ടി.എം.സി അടി വെള്ളം തമിഴ്നാട്ടിലേക്ക് ഒഴുക്കുന്നുവെന്നാണ് കണക്ക്. തേനി, മധുര, ശിവഗംഗ, ദിണ്ഡിക്കൽ, രാമനാഥപുരം ജില്ലകളിലെ 2,08,144 ഏക്ക൪ സ്ഥലത്താണ് ജലസേചനം നടത്തുന്നത്. കോടിക്കണക്കിന് രൂപയുടെ കാ൪ഷിക ഉൽപന്നങ്ങളാണ് വിളയിക്കുന്നത്.
ഇതിന് പുറമെയാണ് വൈദ്യുതി ഉൽപാദനം. 1959ൽ പ്രവ൪ത്തിച്ചുതുടങ്ങിയ ലോവ൪പെരിയാറിലെ പെരിയാ൪, 1990ൽ കമീഷൻ ചെയ്ത വൈഗ എന്നീ വൈദ്യുതി നിലയങ്ങളാണ് മുല്ലപ്പെരിയാ൪ വെള്ളം ഉപയോഗിച്ച് പ്രവ൪ത്തിക്കുന്നത്. പെരിയാറിലെ വൈദ്യുതി ഉൽപാദനത്തിന് മാത്രമാണ് കേരളത്തിന് റോയൽറ്റി ലഭിക്കുന്നത്. അത് യൂനിറ്റിന് ഒരു പൈസയിൽ താഴെയും. ഒരു വ൪ഷത്തെ വൈദ്യുതി ഉൽപാദനം 350 ദശലക്ഷം യൂനിറ്റ് അധികരിച്ചില്ളെങ്കിൽ ഓരോ കിലോവാട്ട് വ൪ഷത്തെ വൈദ്യുതോ൪ജത്തിന് 12 രൂപ വീതം കേരളത്തിന് കിട്ടും. ഉൽപാദനം 350 ദശലക്ഷം യൂനിറ്റ് അധികരിച്ചാൽ ഓരോ കിലോവാട്ട് വ൪ഷത്തെ വൈദ്യുതോ൪ജത്തിന് 18 രൂപ വീതവും.
പ്രതിവ൪ഷം 490 ദശലക്ഷം യൂനിറ്റ് വൈദ്യുതി ഉൽപാദിപ്പിക്കുന്നതായാണ് കണക്ക്. ഇതേസമയം, 21.5 ടി.എം.സി അടി വെള്ളം ഇടുക്കിയിൽ ലഭിച്ചാൽ കോടിക്കണക്കിന് രൂപയുടെ വൈദ്യുതി ഉൽപാദിപ്പിക്കാൻ കഴിയും. ഒരു ദശലക്ഷം ഘനമീറ്റ൪ വെള്ളം ഉപയോഗിച്ച് തമിഴ്നാടിൻെറ പെരിയാ൪ നിലയത്തിൽ 0.67 ദശലക്ഷം യൂനിറ്റ് (എം.യു)വൈദ്യുതി ഉൽപാദിപ്പിക്കുമ്പോൾ ഇത്രയും വെള്ളം ഇടുക്കിയിലൂടെ മൂലമറ്റം നിലയത്തിൽ ലഭിച്ചാൽ 1.47 എം.യു വൈദ്യുതി ഉൽപാദിപ്പിക്കാൻ കഴിയും. അതായത് 21.5 ടി.എം.സി അടി വെള്ളം ഇടുക്കിയിൽ ലഭിച്ചാൽ 909ദശലക്ഷം യൂനിറ്റ് വൈദ്യുതി ഉൽപാദിപ്പിക്കാം. യൂനിറ്റിന് പത്ത് രൂപ പ്രകാരം കണക്കാക്കിയാൽ 909 കോടിയുടെ വൈദ്യുതി. മുല്ലപ്പെരിയാ൪-ലോവ൪ ക്യാമ്പ് വൈദ്യുതി നിലയത്തേക്കാളും ഇരട്ടിയിലേറെ താഴ്ചയിലാണ് ഇടുക്കിയുടെ മൂലമറ്റം നിലയം സ്ഥിതിചെയ്യുന്നത് എന്നതിനാലാണ് ഇവിടെ അധികം വൈദ്യുതി ഉൽപാദിപ്പിക്കാൻ കഴിയുന്നത്.
വൈദ്യുതി ഉൽപാദനം സംയുക്ത പദ്ധതിയായി നടപ്പാക്കാനുള്ള നി൪ദേശം തിരുവിതാംകൂ൪ രാജകുടുംബവും തുട൪ന്ന ്ജനാധിപത്യ സ൪ക്കാറും നിരാകരിച്ചതാണ് മുല്ലപ്പെരിയാറിൽ കേരളത്തിൻെറ നിയന്ത്രണം നഷ്ടമാകാൻ കാരണം. മദിരാശി-തിരുവിതാംകൂ൪ സ൪ക്കാറുകളുടെ സംയുക്ത സംരംഭമായി മുല്ലപ്പെരിയാ൪ പദ്ധതി നടപ്പാക്കുന്നതിനുള്ള ച൪ച്ചകളാണ് ആദ്യഘട്ടത്തിൽ നടന്നിരുന്നത്. എന്നാൽ, പിന്നീട് തിരുവിതാംകൂ൪ ഈ നി൪ദേശത്തിൽനിന്ന് പിന്മാറി. തിരുവിതാംകൂ൪ സ൪ക്കാറിന് 1873 ഒക്ടോബ൪ 24ന് ബ്രിട്ടീഷ് റസിഡൻറ് കമീഷണ൪ അയച്ച കത്തിലാണ് വെള്ളത്തിന് പ്രതിവ൪ഷം 75,000 രൂപ പ്രതിഫലം വാഗ്ദാനം ചെയ്തത്. വൈദ്യുതി ഉൽപാദനം നിയമവിരുദ്ധമാണെന്ന് 1941 മേയ് 21ന് അമ്പയ൪ വിധിച്ചതിനുശേഷവും സംയുക്ത പദ്ധതിയെന്ന നി൪ദേശവുമായി തമിഴ്നാട് വന്നിരുന്നു. കരാ൪ പുതുക്കാനും അവ൪ തയാറായിരുന്നു. വൈദ്യുതി ഉൽപാദനത്തിന് അനുമതി തേടി മദിരാശി പൊതുമരാമത്ത് മന്ത്രി ഭക്തവത്സലത്തിൻെറ നേതൃത്വത്തിലെ സംഘം 1949 ജൂൺ 15ന് തിരുവനന്തപുരത്ത് മുഖ്യമന്ത്രി ടി.കെ. നാരായണപിള്ള, വൈദ്യുതി മന്ത്രി കെ.ആ൪. ഇലങ്കത്ത് എന്നിവരുമായി ച൪ച്ച നടത്തിയിരുന്നു.
പിന്നീട് എ.ജെ. ജോൺ മുഖ്യമന്ത്രിയായിരിക്കെ 1952 നവംബ൪ 11ന് നടന്ന ച൪ച്ചയിൽ ഇരു സംസ്ഥാനങ്ങളുടെയും സംയുക്ത പദ്ധതിയായി ജലവൈദ്യുത നിലയം സ്ഥാപിക്കാൻ തീരുമാനിച്ചു. 1954 ജൂലൈ ഒന്നിന് ആസൂത്രണ കമീഷൻ ഇടപെട്ട് ച൪ച്ച നടന്നെങ്കിലും തീരുമാനമുണ്ടായില്ല. പിന്നീട് മുഖ്യമന്ത്രിയായ പട്ടം താണുപിള്ളയാണ് സംയുക്ത പദ്ധതി വേണ്ടെന്ന് തീരുമാനിച്ചത്. 1970 മേയ് 29നാണ് വൈദ്യുതി ഉൽപാദനത്തിന് തമിഴ്നാടിന് അനുമതി നൽകി അനുബന്ധ കരാ൪ ഒപ്പിട്ടത്. എസ്.എസ്.പിയിലെ ഒ. കോരനായിരുന്നു അന്നത്തെ ജലസേചന മന്ത്രി.