മിന്നല്‍ പരിശോധന

കോട്ടയം: നഗരത്തില്‍ ആരോഗ്യവിഭാഗം നടത്തിയ പരിശോധനയില്‍ ആറ് ഹോട്ടലുകളില്‍നിന്ന് പഴകിയ ഭക്ഷണസാധനങ്ങള്‍ പിടിച്ചെടുത്തു. കഞ്ഞിക്കുഴി, റെയില്‍വേ സ്റ്റേഷന്‍ തുടങ്ങിയ സ്ഥലങ്ങളിലെ ഹോട്ടലുകളിലായിരുന്നു നഗരസഭ ആരോഗ്യവിഭാഗത്തിന്‍െറ മിന്നല്‍ പരിശോധന. പൊറോട്ട, ചിക്കന്‍ കറി, ഫ്രൈഡ് റൈസ് എന്നിവയാണ് പിടിച്ചെടുത്തത്. പിടിച്ചെടുത്ത ഭക്ഷണ സാധനങ്ങള്‍ നശിപ്പിച്ച സംഘം ഇവര്‍ക്ക് നോട്ടീസ് നല്‍കി. ഹോട്ടലുകളില്‍ കൃത്യമായി പരിശോധന നടത്താത്തതിന് ഭക്ഷ്യസുരക്ഷ വിഭാഗത്തിനും നഗരസഭ നോട്ടീസ് നല്‍കി. വെള്ളിയാഴ്ച രാവിലെ എഴിനാണ് പരിശോധന ആരംഭിച്ചത്. മഴക്കാലത്തിന് മുന്നോടിയായായിരുന്നു റെയ്ഡ്. പഴകിയ ഭക്ഷണ സാധനങ്ങള്‍ വില്‍ക്കുന്നതായി പരാതിയും ഉണ്ടായിരുന്നു. തുടര്‍ദിവസങ്ങളില്‍ ബേക്കറികളും തട്ടുകടകളും പരിശോധിക്കുമെന്ന് നഗരസഭ സ്റ്റാന്‍ഡിങ് കമ്മിറ്റി ചെയര്‍മാന്‍ വി.കെ. അനില്‍കുമാര്‍ പറഞ്ഞു. ബേക്കറികളില്‍ പഴകിയതും വൃത്തിയില്ലാത്തതുമായ ഭക്ഷണം നല്‍കുന്നതായി പരാതിയുണ്ടെന്നും അദ്ദേഹം പറഞ്ഞു. ഹെല്‍ത്ത് ഇന്‍സ്പെക്ടര്‍ ശോഭനകുമാരിയുടെ നേതൃത്വത്തിലായിരുന്നു പരിശോധന.