പാരിസ്ഥിതിക കര്‍മ പദ്ധതി ഉദ്ഘാടനം നാളെ

കണ്ണൂര്‍: പരിസ്ഥിതി വകുപ്പ് നടപ്പാക്കുന്ന പങ്കാളിത്ത പാരിസ്ഥിതിക കര്‍മ പദ്ധതിയുടെ ഉദ്ഘാടനം വ്യാഴാഴ്ച രാവിലെ 9.30 ന് മുഖ്യമന്ത്രി ഉമ്മന്‍ചാണ്ടി കലക്ടറേറ്റില്‍ നിര്‍വഹിക്കും. സംസ്ഥാനത്താകെ ഒരു മണിക്കൂര്‍ കൊണ്ട് 10 ലക്ഷം വൃക്ഷതൈകള്‍ നടുന്ന പദ്ധതിയാണിത്. ഇതില്‍ നാല് ലക്ഷം മരങ്ങളും ജില്ലയില്‍ നട്ടുപിടിപ്പിക്കും. പരിസ്ഥിതി ദിനത്തില്‍ രാവിലെ 10.30 മുതല്‍ 11.30 വരെയാണ് പരിപാടി നടപ്പാക്കുക. സ്വകാര്യ സ്കൂളുകള്‍ അടക്കമുള്ള വിദ്യാഭ്യാസ സ്ഥാപനങ്ങള്‍ വഴി 2.25 ലക്ഷവും തദ്ദേശ സ്വയം ഭരണ സ്ഥാപനങ്ങള്‍ വഴി ഒരു ലക്ഷവും മറ്റു സര്‍ക്കാര്‍ വകുപ്പുകള്‍ മുഖാന്തരം ബാക്കിയുള്ളവയും നട്ടുപിടിപ്പിക്കും. നടീല്‍ വസ്തുക്കള്‍ ആവശ്യമുള്ള സന്നദ്ധ സംഘങ്ങള്‍ക്കും വ്യക്തികള്‍ക്കും കണ്ണോത്തുംചാലിലുള്ള അസി. ഫോറസ്റ്റ് കണ്‍സര്‍വേറ്ററുടെ ഓഫിസില്‍ അപേക്ഷ നല്‍കിയാല്‍ തൈകള്‍ ലഭ്യമാക്കും.