ചിക്കണംകുടി സ്കൂള്‍ അടച്ചുപൂട്ടല്‍ ഭീഷണിയിലേക്ക്

മാങ്കുളം: ചിക്കണംകുടി ട്രൈബല്‍ സ്കൂള്‍ അടച്ചുപൂട്ടല്‍ ഭീഷണിയിലേക്ക്. മാങ്കുളം പഞ്ചായത്തിലെ ആദ്യ സര്‍ക്കാര്‍ സ്കൂളായ ചിക്കണംകുടി 2000 ല്‍ ഡി.പി.ഇ.പി പദ്ധതിയിലാണ് ആരംഭിച്ചത്. എല്‍.പി സ്കൂളായതോടെ ഡി.പി.ഇ.പി, എസ്.എസ്.എ ഫണ്ട് ഉപയോഗിച്ച് മനോഹരമായ കെട്ടിടവും അനുബന്ധ സൗകര്യങ്ങളും ഏര്‍പ്പെടുത്തി. മൂന്ന് വര്‍ഷം മുമ്പാണ് സ്കൂളില്‍ ഹെഡ്മാസ്റ്റര്‍ തസ്തിക അനുവദിച്ചത്. ഈ തസ്തികയില്‍ സര്‍ക്കാര്‍ നിയമിക്കുന്ന ആളും മറ്റ് മൂന്ന് അധ്യാപക തസ്തികകളില്‍ പഞ്ചായത്തും എ.ഇ.ഒയും ചേര്‍ന്ന് നടത്തുന്ന താല്‍കാലിക നിയമനവുമായിരുന്നു ഇതുവരെ .എന്നാല്‍ ഇപ്പോള്‍ ഹെഡ്മാസ്റ്ററെ സ്ഥലംമാറ്റി പകരം സര്‍വീസിലുളള മറ്റൊരധ്യാപകനെ ഇവിടെ നിയമിച്ചു. ബാക്കി ഒഴിവില്‍ അധ്യാപനം നടത്തിയിരുന്ന താല്‍കാലിക അധ്യാപകരെ പിരിച്ചുവിടാനാണ് വാക്കാല്‍ നിര്‍ദേശം ലഭിച്ചിട്ടുള്ളത്. താല്‍കാലിക അധ്യാപകരെ നിയമിക്കാന്‍ അനുമതി നല്‍കാതിരിക്കുകയും നിലവിലുള്ള ഒരധ്യാപകനെ കോണ്‍ഫറന്‍സിനും മറ്റാവശ്യങ്ങള്‍ക്കുമായി വിളിക്കുകയും ചെയ്യുന്നതോടെ കുട്ടികള്‍ വഴിയാധാരമാകുന്ന അവസ്ഥയാണ്.