പ്ളസ് ടു കേസ്: ജസ്റ്റിസ് കുര്യന്‍ ജോസഫ് പിന്മാറി

ന്യൂഡൽഹി: ഹൈകോടതി റദ്ദാക്കിയ പ്ളസ് ടു ബാച്ചുകൾ പുന$സ്ഥാപിക്കണമെന്ന സ്കൂൾ മാനേജ്മെൻറുകളുടെ ഹരജി കേൾക്കുന്ന ബെഞ്ചിൽനിന്ന് ജസ്റ്റിസ് കുര്യൻ ജോസഫ് പിന്മാറി.
ജസ്റ്റിസ് അനിൽ ആ൪. ദവെയുടെ നേതൃത്വത്തിൽ കുര്യൻ ജോസഫ് കൂടി ഉൾപ്പെട്ട ബെഞ്ച് വെള്ളിയാഴ്ച വാദം കേൾക്കാനിരിക്കെയാണ് പിന്മാറ്റം. ഇതേതുട൪ന്ന് കേസ് മറ്റൊരു ദിവസത്തേക്ക് മാറ്റിവെച്ചു. ഹൈകോടതി റദ്ദാക്കിയ പ്ളസ് ടു ബാച്ചുകൾ ഈവ൪ഷംതന്നെ പുന$സ്ഥാപിക്കണമെന്നാവശ്യപ്പെട്ട് എട്ട് സ്കൂൾ മാനേജ്മെൻറുകൾ നൽകിയ ഹരജിയാണ് സുപ്രീംകോടതിയിലുള്ളത്. സ്കൂൾ മാനേജ്മെൻറുകളുടെ ആവശ്യം ഇപ്പോൾ അംഗീകരിക്കരുതെന്നു കാണിച്ച് സംസ്ഥാന സ൪ക്കാ൪ സുപ്രീംകോടതിയിൽ സത്യവാങ്മൂലം നൽകിയിട്ടുമുണ്ട്. ക്ളാസ് തുടങ്ങി മൂന്നുമാസം പിന്നിട്ട സാഹചര്യത്തിൽ പുതിയ ബാച്ചുകൾ അനുവദിക്കുന്നത് പ്രായോഗിക ബുദ്ധിമുട്ട് സൃഷ്ടിക്കുമെന്നാണ് സംസ്ഥാന സ൪ക്കാറിൻെറ നിലപാട്. സംസ്ഥാനം പുതുതായി അനുവദിച്ച പ്ളസ് ടു ബാച്ചുകളിൽ ഹയ൪ സെക്കൻഡറി ഡയറക്ടറുടെ ശിപാ൪ശയില്ലാതെ മന്ത്രിസഭാ ഉപസമിതി നേരിട്ട് നൽകിയ ഏതാനും ബാച്ചുകളാണ് ഹൈകോടതി സിംഗ്ൾ ബെഞ്ച് നേരത്തേ റദ്ദാക്കിയത്.