‘എന്റെ മകനായിരുന്നു അവൻ’; അപകടത്തിൽ മരിച്ച മലയാളി ജീവനക്കാര​ന്റെ കുടുംബത്തെ ചേർത്തു പിടിച്ച് സൗദി സ്​പോൺസർ, ജീവിത കാലം മുഴുവൻ ശമ്പളം നൽകും

റിയാദ്​: തികച്ചും ആകസ്മികമായി തന്റെ ഹൗസ് ഡ്രൈവർ അപകടത്തിൽ മരിച്ചതിനെ തുടർന്ന് തകർന്നിരിക്കയാണ് സൗദി സ്​പോൺസർ. മകനെ പോലെ സ്നേഹിച്ചിരുന്ന എറണാകുളം സ്വദേശിയായ സിയാദ് ബഷീർ മരിച്ചതിനെ തുടർന്ന് വീട്ടിൽ അനുശോചന ചടങ്ങ് നടക്കുകയാണെന്ന ബോർഡും അദ്ദേഹം വെച്ചു.

താൻ ജീവിക്കുന്ന കാലത്തോളം സിയാദിന് ശമ്പളം നൽകുമെന്നും സ്​പോൺസർ അറിയിച്ചു. തൊടുപുഴ രണ്ടുപാലം സ്വദേശിയും നിലവിൽ എറണാകുളം പറവൂർ മാഞ്ഞാലിയിൽ താമസക്കാരനുമായ കണിയാംപറമ്പിൽ ബഷീറി​െൻറ മകൻ സിയാദ് (36) ആണ്​ മരിച്ചത്​. റിയാദ്​ എക്​സിറ്റ്​ എട്ടിൽ ഹൗസ്​ ഡ്രൈവറായി ജോലി ചെയ്യുകയായിരുന്നു.

ഏഴുവർഷമായി സ്വദേശി പൗര​ന്റെ വീട്ടിലെ ഡ്രൈവറാണ്​. ​വെള്ളിയാഴ്​ച ഉച്ചക്ക്​ എ.സിയുടെ കംപ്രസർ പൊട്ടിത്തെറിച്ചായിരുന്നു അപകടം. ഗുരുതരമായി പൊള്ളലേറ്റ യുവാവിനെ ഉടൻ എക്​സിറ്റ്​ ഒമ്പതിലെ അൽ മുവാസത്ത്​ ആശുപത്രി തീവ്രപരിചരണ വിഭാഗത്തിൽ പ്രവേശിപ്പിച്ചു.

ചികിത്സയിലിരിക്കെ ഞായറാഴ്​ച ഉച്ചക്ക്​ 2.10ഓടെ മരിക്കുകയായിരുന്നു.മയ്യിത്ത് തിങ്കളാഴ്​ച ഉച്ചക്ക്​ ശേഷം റിയാദിലെ നസീം ഹയ്യൂൽ സലാം മഖ്​ബറയിൽ ഖബറടക്കി. സ്​പോൺസർ മയ്യത്ത് മറവുചെയ്യാൻ സഹായിക്കുകയും സുഹൃത്തുക്കളോടും അയൽവീട്ടുകാരോടുമെല്ലാം സിയാദിന്റെ ജോലിയിലുള്ള അർപ്പണ ബോധത്തെ കുറിച്ച് വാചാലനാവുകയും ചെയ്തു. സിയാദിന്​ ഭാര്യയും മകളുമു​ണ്ട്​. മാതാവ്​: ഉമ്മു ഖുൽസു. സഹോദരി: സുമയ്യ.