അംബേദ്​കറെ പിഴുതെറിയാൻ വ്യാമോഹിക്കുന്നവർ

അനീതികൾക്കും അസമത്വത്തിനുമെതിരെ അനുനയപ്പെടാൻ കൂട്ടാക്കാതെ പൊരുതിയ ഭരണഘടനാ ശിൽപി ബാബാ സാഹേബ്​ അംബേദ്​കറുടെ 134ാം ജന്മദിനം കഴിഞ്ഞ 14ന് രാജ്യത്തിനകത്തും ഐക്യരാഷ്​ട്ര സഭയിലുമുൾപ്പെടെ ആഘോഷിക്കവെ ഉത്തർപ്രദേശിലെ ഒരുകൂട്ടം ​പൊലീസധികാരികൾ ഒരു പ്രത്യേകതരം കർസേവയിലായിരുന്നു. ഡോ.അംബേദ്​കറുടെ സ്​മരണയുണർത്തുന്ന പ്രതിമകളും സ്​തൂപങ്ങളും പിഴുതു മാറ്റാൻ ഈ മാസം ആദ്യവാരംതന്നെ അവർ ഇറങ്ങിത്തിരിച്ചിരുന്നു​.

അധികാരികളുടെ അനുമതി വാങ്ങാതെയാണ്​ ലഖ്​നോവിലെ ഖാന്താരി ഗ്രാമത്തിൽ ദലിത്​ സമൂഹം അംബേദ്​കർ പ്രതിമ സ്ഥാപിച്ചതെന്നാണ്​ പൊലീസ്​ കണ്ടെത്തിയ നിയമ ലംഘനം. പൊലീസ്​ സംഘം സബ്​ ഡിവിഷനൽ മജിസ്​ട്രേറ്റിനെയും കൂട്ടിവന്ന്​ പ്രതിമ പൊളിക്കാൻ ഒരു​മ്പെട്ടെങ്കിലും ജനം ശക്തമായി പ്രതിരോധിച്ചു. ലാത്തിയും കണ്ണീർ വാതകവും പ്രയോഗിച്ചെങ്കിലും ജയ്​ ഭീം വിളികളുമായി അവർ പ്രതിമക്ക്​ വലയം തീർത്തതോടെ ഉദ്യോഗസ്ഥ സംഘത്തിന്​ മടങ്ങിപ്പോകേണ്ടി വന്നു.

പ്രതിമ സ്ഥാപിക്കാൻ ഔദ്യോഗികമായി അനുമതി ലഭിച്ചിട്ടില്ല എന്നത്​ ശരിയാണ്​. പക്ഷേ, ഇന്നോ ഇന്ന​ലെയോ അല്ല, ഗ്രാമസഭയും പ്രാദേശിക ഭൂവിനിയോഗ സമിതിയും ഒറ്റക്കെട്ടായി അംഗീകരിച്ച അംബേദ്​കർ പ്രതിമ പദ്ധതിക്ക്​ ​ അനുമതി തേടി ഏതാണ്ട്​ മൂന്നു​ വർഷമായി ഓഫിസുകൾ കയറിയിറങ്ങുകയായിരുന്നു ഖാന്താരിയിലെ ദലിതുകൾ. ഇത്ര കാത്തിരുന്നിട്ടും മറുപടിയൊന്നും ലഭിക്കാതെ വന്നതോടെ​യാണ്​ ​ പ്രതിമ സ്ഥാപിക്കലുമായി അവർ മുന്നോട്ടു പോയത്​. അതോടെ ഭരണകൂടം സടകുടഞ്ഞെണീറ്റു, നിയമവും നടപടിക്രമങ്ങളും പറയാനും നടപ്പാക്കാനും തുടങ്ങി.

ഖാന്താരിയിലേത്​ ഒരു ഒറ്റപ്പെട്ട സംഭവമല്ല. അംബേദ്​കർ ജയന്തി ദിനത്തിൽ അനാച്ഛാദനം ചെയ്യുന്നതിനായി ഝാൻസി ജില്ലയിലെ ജർബോ ഗ്രാമത്തിൽ ദലിത്​ ജനങ്ങൾ അര ലക്ഷം രൂപ ചെലവിട്ട്​​ സ്ഥാപിച്ച​ പ്രതിമ ​12ന് രായ്​ക്ക്​ രാമാനം പൊലീസും റവന്യൂ അധികാരികളുമെത്തി നീക്കം ചെയ്​തു. ദലിതുകൾക്കെതിരെ കേസുമെടുത്തു. അനുമതിയില്ലാതെ പ്രതിമ സ്ഥാപിച്ചു, സർക്കാർ ഉടമസ്ഥതയിലുള്ള പൊതുസ്ഥലത്ത്​ പ്രതിമ സ്ഥാപിച്ചു എന്നീ ആരോപണങ്ങൾ മനസ്സിലാക്കാം; അധികാരികളിൽനിന്ന്​ അനുമതി ലഭിച്ചിട്ടില്ലെന്നും എല്ലാ വിഭാഗങ്ങളുടെയും സമ്മതത്തോടെ ഗ്രാമവാസികൾ ഒറ്റക്കെട്ടായാണ്​ പ്രതിമ സ്ഥാപിച്ചതെന്നും ​ദലിത്​ സമുദായാംഗമായ ഗ്രാമമുഖ്യ മാധ്യമ പ്രവർത്തകരോട്​ പ്രതികരിക്കുകയുമുണ്ടായി. എന്നാൽ, പൊലീസ്​ ചുമത്തിയിരിക്കുന്ന കേസും വകുപ്പുകളും അറിയു​​​​മ്പോളാണ് ഭരണകൂടത്തി​ന്റെ ഉള്ളിലിരിപ്പും ജാതിഭീകരതയുടെ ആധിക്യവും വെളിപ്പെടുന്നത്​. അംബേദ്​കർ പ്രതിമ സ്ഥാപിച്ച്​ വിവിധ ജാതി-വിഭാഗങ്ങൾക്കിടയിൽ ശത്രുതയും സാമൂഹിക സൗഹാർദത്തിന്​ ഭീഷണിയും സൃഷ്​ടിച്ചു എന്നാണ്​ യോഗിയുടെ വർഗീയ-ജാതീയ പൊലീസ്​ ചമക്കുന്ന ആഖ്യാനം. ഭരണഘടനാ ശിൽപിയുടെ പ്രതിമ കണ്ടാൽ ശത്രുത തോന്നുന്നവരെയല്ലേ ചികിത്സിക്കേണ്ടത്​?

സീതാപൂരിൽ സ്ഥാപിച്ച അംബേദ്​കറുടെയും ബുദ്ധ ഭഗവാന്റെയും പ്രതിമകൾ നീക്കണമെന്ന സബ്​ ഡിവിഷനൽ മജിസ്ട്രേറ്റിന്റെ അന്ത്യശാസനം ജനങ്ങൾ അംഗീകരിച്ചില്ലെന്നതിനാൽ മൂന്ന് സ്റ്റേഷനുകളിൽനിന്നുള്ള പൊലീസുകാരുടെ​ അകമ്പടിയിൽ ഭരണകൂടം അവ ഇളക്കി മാറ്റി. പ്രതിഷേധവുമായി മുന്നോട്ടുവന്ന സ്​ത്രീകളും കുട്ടികളുമടങ്ങുന്ന ദലിത്​ സമൂഹത്തിന്​ ​നേരെ ബലപ്രയോഗം നടത്തി, കൊലപാതകത്തിന്​ ശ്രമിച്ചുവെന്നും സർക്കാർ ഉദ്യോഗസ്ഥരുടെ കൃത്യ നിർവഹണത്തിന്​ തടസ്സം സൃഷ്​ടിച്ചുവെന്നും പൊതുമുതൽ നശിപ്പിച്ചുവെന്നുമെല്ലാമുള്ള കുറ്റങ്ങൾ ചാർത്തി ​അവർക്കെതിരെ കേസുമെടുത്തു.

പ്രതിമ സ്ഥാപിക്കൽ നാം കരുതുന്നത്ര എളുപ്പമുള്ള സംഗതിയല്ല. വിശുദ്ധരുടെയും മഹാ​വ്യക്തികളുടെയും പ്രതിമകൾ അധികാരികളുടെ അനുമതി കൂടാതെ സ്വകാര്യ ഭൂമിയിൽ പോലും സ്ഥാപിക്കരുത്​ എന്നാണ്​ 2008ലെ ഒരു സർക്കാർ ഉത്തരവ്​. പൊതുവഴികളിലും നടപ്പാതകളിലും മറ്റും പ്രതിമകൾ സ്ഥാപിക്കുന്നതിന്​ അനുമതി നൽകരുതെന്ന്​ 2013ൽ സുപ്രീംകോടതിയും സർക്കാറുകളോട്​ നിർദേശിച്ചിട്ടുണ്ട്​- പക്ഷേ, പ്രതിമ അംബേദ്​കറുടെതാകു​​മ്പോൾ മാത്രം അതു​ നടപ്പാക്കാൻ യു.പി ഭരണകൂടം പ്രത്യേക ശുഷ്​കാന്തി പുലർത്തുന്നതിനു​ പിന്നിലെ താൽപര്യം വേറെയാണ്​. കാവിക്കൂട്ടങ്ങൾ കെട്ടുന്ന ഹിന്ദുത്വ-ജാതിയാധിപത്യ രാഷ്​ട്ര മനക്കോട്ടകൾക്ക്​ നിരന്തരം വിഘാതം തീർത്തുകൊണ്ടിരിക്കുന്ന ബാബാ സാഹേബി​​ന്റെ ഓർമകൾ അവരെ അത്രമാത്രം ഭയപ്പെടുത്തുന്നുണ്ട്​.

രാജ്യം ഭരണഘടന അംഗീകരിച്ചതി​​െൻറ 75ാം വാർഷിക സ്​മരണ പുതുക്കാൻ പാർലമെൻറിൽ നടന്ന പ്രത്യേക ഭരണഘടനാ ചർച്ചയുടെ സമാപന പ്രസംഗത്തിൽ ​കേന്ദ്ര ആഭ്യന്തരമന്ത്രി നടത്തിയ പരാമർശങ്ങൾ മറക്കാറായിട്ടില്ല. ‘‘അംബേദ്​കർ, അംബേദ്​കർ എന്ന്​ പറയുന്നത്​ ഒരു ഫാഷനായിരിക്കുന്നു, ഇത്രയും വട്ടം ഭഗവാ​​ന്റെ നാമം ഉരുവിട്ടിരുന്നുവെങ്കിൽ സ്വർഗം ലഭിക്കുമായിരുന്നു’’ എന്നാണ്​ അമിത്​ ഷാ നടത്തിയ നിന്ദാ പരാമർശം. എങ്കിലെന്ത്​ ഇപ്പോളുമെപ്പോളും മത നിരപേക്ഷ ജനാധിപത്യ ഇന്ത്യയുടെ നിലനിൽപ്പിനായുള്ള ഓരോ ചർച്ചയിലും കൂട്ടായ്​മകളിലും ആ നാമം പേർത്തും പേർത്തും ഉരുവിടപ്പെടുന്നു. ഉന്നതവിദ്യാഭ്യാസ കേന്ദ്രങ്ങളുടെ വർഗീയവത്​കരണത്തിനെതിരായ പോരാട്ടത്തിലെന്ന ​പോലെ, പൗരത്വ വിവേചനത്തിനെതിരായ ബഹുജന പ്രക്ഷോഭത്തിലെന്നപോലെ, വഖഫ്​ സ്വത്തുക്കളുടെ സംരക്ഷണത്തിനായി രാജ്യമൊട്ടുക്ക്​ നടക്കാനിരിക്കുന്ന മുന്നേറ്റങ്ങളിലും ഉയർന്നു നിൽക്കുക നീലക്കോട്ടണിഞ്ഞ്​ പുഞ്ചിരിച്ചു നിൽക്കുന്ന ഡോ. അംബേദ്കറും അദ്ദേഹം അണിയിച്ചൊരുക്കിയ ഭരണഘടനയുമായിരിക്കും. സാമൂഹിക നീതിക്കായുള്ള ഓരോ തേട്ടത്തിലും ഈ നാമം മുഴങ്ങിക്കൊണ്ടേയിരിക്കും. അധികാര ഗർവി​ന്റെ ബലത്തിൽ പ്രതിമകൾ ഇളക്കിമാറ്റാൻ ഹിന്ദുത്വ സർക്കാറിന്​ സാധിച്ചേക്കാം. യു.പിയിൽ മാത്രമല്ല, വിദ്വേഷ ശക്തികൾക്ക്​ ആധിപത്യമുള്ള സംസ്ഥാനങ്ങളിലെല്ലാം അതു​ നടക്കുന്നുമുണ്ട്​. പക്ഷേ, ആ ഓർമകളും ആദർശവും പിഴുതുമാറ്റുക എന്നത്​ വല്ലാത്തൊരു വ്യാമോഹം മാത്രമായി അവശേഷിക്കും.