ജനത്തിന്‍റെ കണക്കെടുത്തത് കൊണ്ടായില്ല

രാജ്യത്തിന്‍റെ പതിനാറാമത്​ ജനസംഖ്യ കണക്കെടുപ്പ്​ തീയതി കേന്ദ്രസർക്കാർ​ പ്രഖ്യാപിച്ചതോടെ നാലു വർഷമായി മുടങ്ങിക്കിടന്ന വിഭവശേഷി വിവര സമാഹരണയജ്ഞം അടുത്തവർഷം പൂർത്തിയാക്കുമെന്നുറപ്പായി. കഴിഞ്ഞ തവണത്തേതുപോലെ വീടും മറ്റു വസ്തുവകകളും തിട്ടപ്പെടുത്തുന്ന ഹൗസ്​ ലിസ്റ്റിങ്​ ഓപറേഷൻ (എച്ച്​.എൽ.ഒ) ആദ്യഘട്ടത്തിൽ നടക്കും. തുടർന്ന്​ രണ്ടാം ഘട്ടത്തിൽ ജനസംഖ്യാപരവും സാമൂഹിക-സാമ്പത്തിക-സാംസ്കാരികപരവുമായ വിവരങ്ങൾ ശേഖരിക്കുന്ന ജനങ്ങളുടെ തലയെണ്ണൽ നടക്കും. ആഭ്യന്തര മന്ത്രാലയത്തിന്‍റെ പ്രഖ്യാപനമനുസരിച്ച്​ കേന്ദ്രഭരണപ്രദേശമായ ലഡാക്ക്​, ജമ്മു-കശ്മീർ എന്നിവിടങ്ങളിലും ഹിമാചൽ പ്രദേശ്​, ഉത്തരാഖണ്ഡ്​ സംസ്ഥാനങ്ങളിലും ഒഴികെ ഇന്ത്യയിലുടനീളം അടുത്ത വർഷം മാർച്ച്​ ഒന്നിന്​ സെൻസസ്​ ആരംഭിക്കും, മുൻപറഞ്ഞ ഇടങ്ങളിൽ ഈ വർഷം ഒക്​ടോബർ ഒന്നാണ്​ റഫറൻസ്​ തീയതിയായി നിശ്ചയിച്ചിട്ടുള്ളത്​. സ്വതന്ത്ര ഇന്ത്യയിൽ ആദ്യമായി ജനങ്ങളുടെ ജാതിതിരിച്ചുള്ള കണക്കെടുക്കുന്ന ആദ്യ സെൻസസ്​ ആയിരിക്കും ഇത്തവണത്തേത്​. 1931ലാണ്​ ഇതിനുമുമ്പ് ജാതിസെൻസസ്​ നടത്തിയത്​. പത്തുവർഷത്തിലൊരിക്കൽ നടന്നുവരുന്ന ശ്രമകരമായ സെൻസസ്​ ദൗത്യം 2021ൽ നടക്കേണ്ടതായിരുന്നു. എന്നാൽ, അതിനുള്ള ​ഒരുക്കങ്ങൾ പൂർത്തിയായെങ്കിലും കോവിഡ്​ മഹാമാരി കാരണം മാറ്റിവെക്കുകയാണുണ്ടായത്​.

മുപ്പത്​ ലക്ഷം എന്യൂമറേറ്റർമാർ, ജില്ല, ഉപജില്ല തലങ്ങളിൽ സെൻസസ്​ പ്രവർത്തനത്തിന്‍റെ മേൽനോട്ടത്തിനും സഹായത്തിനുമായി 1,20,000 ജോലിക്കാർ, 46,000 പരിശീലകർ എന്നിങ്ങനെ ബൃഹത്തായ മനുഷ്യാധ്വാനവും ദീർഘ കാലയളവും വേണ്ടിവരുന്ന കഠി​​​നപ്രയത്നമാണ്​ ജനസംഖ്യ കണക്കെടുപ്പ്​. ഇത്തവണ ഇന്ത്യയിലാദ്യമായി ഡിജിറ്റൽ സെൻസസ്​ പരീക്ഷിക്കും. മൊബൈൽ ആപ്​ ഉപയോഗിച്ച്​ വ്യക്തികൾക്ക്​ സ്വന്തമായി കണക്കെടുക്കുന്നതിനും അതിന്‍റെ പരിശോധനക്കുമുള്ള സൗകര്യമൊരുക്കും. ഇംഗ്ലീഷ്​, ഹിന്ദി എന്നിവക്ക് പുറമെ 14 പ്രാദേശികഭാഷകളിൽ തയാറാക്കുന്ന ഈ ആപ്പിൽ ലോഗ്​ ഇൻ ചെയ്ത്​ വ്യക്തികൾക്ക്​ വിവരങ്ങൾ ചേർക്കാനാകും. തുടർന്ന്​ ലഭ്യമാകുന്ന യു.ഐ.ഡി കണക്കെടുപ്പ്​ ഉദ്യോഗസ്ഥരെത്തുമ്പോൾ അവർക്ക് നൽകിയാൽ മതിയാകും. ഉദ്യോഗസ്ഥരുടെ കൈയിലും അതിനുള്ള ഉപകരണവും ആപ് ഡൗൺലോഡ്​ ചെയ്ത സ്മാർട്ട്​ഫോണുകളും ഉണ്ടായിരിക്കും. തെറ്റുകൾ കുറക്കാനും ജോലി വേഗത്തിലാക്കാനും വിവരങ്ങളുടെ ഗുണശേഷി വർധിപ്പിക്കാനും ഡിജിറ്റലൈസേഷൻ സഹായമാകുമെന്നാണ്​ സർക്കാർ കരുതുന്നത്​. അതുകൊണ്ടുതന്നെ ദേശീയം, സംസ്ഥാനം, ജില്ല, താലൂക്ക്​ തലങ്ങളിൽ ലിംഗാടിസ്ഥാനത്തിലുള്ള ജനസംഖ്യാവിവരങ്ങൾ പ്രസിദ്ധീകരിക്കാൻ ഒമ്പതുമാസം കൊണ്ടു കഴിയുമെന്ന വിശ്വാസത്തിലാണ്​ ഭരണകൂടം. 2011ലെ അവസാന സെൻസസിൽ രണ്ടുവർഷത്തോളം നീണ്ട പ്രക്രിയയായിരുന്നു എന്നറിയുമ്പോഴാണ്​ ഡിജിറ്റൽവത്​കരണത്തിന്‍റെ മേന്മ വ്യക്തമാകുക.

ഗവൺമെന്‍റിന്‍റെ ഒട്ടേറെ പ്രവർത്തനങ്ങൾക്ക്​ ഊടും പാവും നൽകുന്നത്​ സെൻസസിലെ കണക്കുകളാണ്​. തെരഞ്ഞെടുപ്പുകളിൽ മണ്ഡലങ്ങളുടെ നിർണയത്തിനും പട്ടികജാതി-വർഗ സംവരണമണ്ഡലങ്ങൾ കണ്ടെത്തുന്നതിനും മാനദണ്ഡമാക്കുന്നത്​ ഈ കണക്കുകളാണ്​. വിവിധ സബ്​സിഡികൾ, റേഷൻ വിതരണം തുടങ്ങി സംസ്ഥാന, ജില്ലതലങ്ങളിൽ കേന്ദ്രഗവൺമെന്‍റ്​ നൽകുന്ന സഹായങ്ങൾക്ക്​ ആധാരമാക്കുന്നതും ഈ കണക്കുകൾതന്നെ. സ്കൂളുകൾ, പ്രാഥമികാരോഗ്യ​ കേന്ദ്രങ്ങൾ, അടിസ്ഥാനസൗകര്യവികസന പദ്ധതികൾ തുടങ്ങി വിദ്യാഭ്യാസ, ​ഗ്രാമവികസന മന്ത്രാലയങ്ങൾ അവരുടെ സേവനപ്രവർത്തനങ്ങൾ ചിട്ടപ്പെടുത്താനും സെൻസസ്​ വിവരങ്ങളാണ്​ അവലംബിക്കുക. ജുഡീഷ്യറി, ആസൂത്രണവിഭാഗങ്ങൾ, ഗവേഷകർ എന്നിവർക്കും കുടിയേറ്റം, തൊഴിൽ, പ്രത്യുൽപാദനക്ഷമത, നഗരവത്​കരണം തുടങ്ങിയ വിഷയങ്ങളിൽ പുതിയ പ്രവണതകൾ മനസ്സിലാക്കിയെടുക്കാൻ ഇത്​ ഉതകും. മാത്രമല്ല, ഒരു ദേശത്തിലെ ജനതയുടെ ഐഡന്‍റിറ്റി, തൊഴിൽ, ജീവിതനിലവാരം, കുടുംബഘടന എന്നിവയിൽ വരുന്ന മാറ്റങ്ങളുടെ ചിത്രം സെൻസസ്​ നൽകും. അതുവഴി ഭരണകൂടങ്ങൾക്ക്​ ക്ഷേമപദ്ധതികളുടെ ആസൂത്രണത്തിനും വിതരണത്തിനും ശരിയായ മാർഗങ്ങൾ അവലംബിക്കാൻ സാധിക്കും.

ഇന്ത്യ പോലുള്ള ബഹുവിധ ജീവിതനിലവാരം പുലർത്തുന്ന ജനകോടികൾ വസിക്കുന്ന ഒരു രാജ്യത്ത്​ വിഭവവിതരണം എല്ലാവരിലേക്കും ആവശ്യാനുസൃതം എത്തിക്കുവാൻ അവരുടെ ശരിയായ സ്ഥിതിവിവരം ആവശ്യമാണ്​. എന്നാൽ, ഇതിനെ അവലംബിച്ചുതന്നെയാണോ കേന്ദ്രത്തിലും സംസ്ഥാനത്തിലും ഭരണം കൈയാളുന്നവർ കാര്യങ്ങൾ കൊണ്ടുനടത്തുന്നത്​ എന്നു ചോദിച്ചാൽ ഉത്തരം അത്ര സുഖകരമാവില്ല.

ബജറ്റിൽ വിവിധ സംസ്ഥാനങ്ങൾക്ക്​ വകയിരുത്തുന്ന വിഹിതവും പദ്ധതികളുമൊക്കെ വിതരണത്തിലെ അസന്തുലിതത്വം കൊണ്ട്​ എപ്പോഴും പരാതികളുയർത്താറുള്ളതാണ്​. കേന്ദ്ര-സംസ്ഥാനബന്ധങ്ങൾ കക്ഷിരാഷ്ട്രീയത്തിന്‍റെ സങ്കുചിതത്വത്തിലേക്ക്​ ചുരു​ങ്ങുമ്പോഴും ഭരണത്തിലെ മേൽത്തട്ടിലുള്ളവരുടെ പ്രാദേശിക, മത, ജാതി, വംശ ചിന്തകളും പരിഗണനകളും പക്ഷപാതിത്വത്തിലേക്ക്​ വഴിമാറുമ്പോഴും സമൂഹത്തിലെ അടിത്തട്ടിലുള്ളവരാണ്​ അതിന് വില​യൊടുക്കേണ്ടിവരുന്നത്​. രാജ്യത്തെ ജനവിഭാഗങ്ങളുടെ സ്ഥിതിവിവരങ്ങൾ സമാഹരിക്കുന്നതും അതു രാഷ്ട്രത്തിന്‍റെ മുന്നിൽ വെളിപ്പെടുത്തുന്നതും നല്ലതുതന്നെ; ജനങ്ങൾക്കിടയിലെ സാമൂഹികവും സാമ്പത്തികവും സാംസ്കാരികവുമായ ഉച്ചനീചത്വങ്ങൾ തിരിച്ചറിഞ്ഞ്​ പരിഹാരക്രിയ ചെയ്യാൻ അത്​ ഉതകുമെങ്കിൽ. മണ്ഡൽ കമീഷനും സച്ചാർ സമിതിയും കണ്ടെത്തി, അവതരിപ്പിച്ച സ്ഥിതിവിവരങ്ങൾ അധഃസ്ഥിതരുടെ അഭ്യുദയത്തിന് വഴികാട്ടിയ അനുഭവം ഇന്ത്യയിലുണ്ട്​. ജനാധിപത്യത്തിലും ജനക്ഷേമത്തിലും വിശ്വസിക്കുന്ന ഭരണകൂടത്തിന്‍റെ സാന്നിധ്യത്തിലേ അത്തരമൊരു ജനോപകാര സൗഹൃദാന്തരീക്ഷം നിലനിൽക്കുകയുള്ളൂ. എന്നാൽ, പിന്നാക്കക്കാരെയും അടിത്തട്ടിലുള്ളവരെയും അപരവത്​കരിക്കാനും അവഗണനയുടെ അഗണ്യകോടിയിൽ തള്ളാനും അജണ്ടയുമായി നടക്കുന്നവരുടെ കൈയിൽ സ്ഥിതിവിവരങ്ങൾപോലും കണക്കുതീർക്കാനുള്ള ആയുധമായി മാറുകയാണ്​ ചെയ്യുക. അതുകൊണ്ട്​ ജനസംഖ്യയുടെ കണക്കെടുത്തതു കൊണ്ടായില്ല. അതുകൊണ്ട്​ രാജ്യത്തിനും ജനത്തിനും എന്തുപകാരം ഭരണകൂടം ചെയ്യുന്നു എന്നതാണ്​ പ്രധാനം.