നോർവേയിൽ ചരിത്ര കണ്ടെത്തൽ: സ്കൂൾ യാത്രക്കിടെ 1,300 വർഷം പഴക്കമുള്ള വാൾ കണ്ടെത്തി ആറുവയസ്സുകാരൻ

ഓസ്‌ലോ: ഒരു സാധാരണ സ്കൂൾ വിനോദയാത്രയെ ചരിത്രത്തിലെ അവിസ്മരണീയമായ ദിവസമാക്കി മാറ്റിയ ആറുവയസ്സുകാരന്റെ വാർത്തയാണ് ഇപ്പോൾ ലോകശ്രദ്ധ നേടുന്നത്. നോർവേയിലെ ഇൻലാൻഡെറ്റ് കൗണ്ടിയിൽ നടന്ന സ്കൂൾ യാത്രക്കിടയാണ് ഹെൻറിക് റെഫ്‌സ്‌നെസ് മോർട്ടെവെറ്റ് എന്ന ആറുവയസ്സുകാരൻ 1,300 വർഷം പഴക്കമുള്ള അപൂർവ്വമായ ഒരു വാൾ കണ്ടെത്തിയത്.

നോർവേയിലെ ഇൻലാൻഡെറ്റ് കൗണ്ടിയിലെ ഒരു വയലിലൂടെ സഹപാഠികൾക്കും അധ്യാപകർക്കുമൊപ്പം നടക്കുമ്പോഴാണ് ഹെൻറിക്കിന്റെ ശ്രദ്ധ ഭൂമിയിൽ നിന്ന് പുറത്തേക്ക് തള്ളിയിരുന്ന തുരുമ്പിച്ച ഒരു ലോഹവസ്തുവിലേക്ക് തിരിഞ്ഞത്. കാഴ്ചയിൽ അസാധാരണമായി തോന്നിയ ആ വസ്തുവിനെക്കുറിച്ച് കുട്ടി ഉടൻ തന്നെ അധ്യാപകരെ അറിയിച്ചു.

വാൾ കണ്ട ഉടൻ തന്നെ അത് സ്വന്തമായി പുറത്തെടുക്കാൻ ശ്രമിക്കാതെ, ഉത്തരവാദിത്തത്തോടെ അധ്യാപകർ പുരാവസ്തു ഗവേഷകരെ വിവരമറിയിക്കുകയായിരുന്നു. ഈ ജാഗ്രതയാണ് പുരാവസ്തുവിന് കേടുപാടുകൾ സംഭവിക്കാതെ സംരക്ഷിക്കാൻ സഹായിച്ചത്. വിദഗ്ധർ നടത്തിയ ശാസ്ത്രീയ പരിശോധനയിൽ, ഇത് ഏകദേശം 1,300 വർഷം പഴക്കമുള്ളതാണെന്ന് സ്ഥിരീകരിച്ചു. വൈക്കിങ് കാലഘട്ടത്തിന് തൊട്ടുമുമ്പുള്ള സ്കാൻഡിനേവിയയിലെ മെറോവിംഗിയൻ കാലഘട്ടത്തിൽ (ഏകദേശം എഡി 550-880) നിർമിച്ചതാണ് ഈ വാൾ എന്ന് ഗവേഷകർ വ്യക്തമാക്കുന്നു.

കണ്ടെടുത്ത വാൾ ഇപ്പോൾ ഓസ്‌ലോയിലെ മ്യൂസിയം ഓഫ് കൾച്ചറൽ ഹിസ്റ്ററിയിലേക്ക് മാറ്റിയിട്ടുണ്ട്. കാലപ്പഴക്കം കാരണം വാൾ കഠിനമായ തുരുമ്പ് പിടിച്ച അവസ്ഥയിലാണ്. എങ്കിലും, ആധുനിക സാങ്കേതികവിദ്യകളായ എക്സ്-റേ, മെറ്റലർജിക്കൽ വിശകലനങ്ങൾ എന്നിവയിലൂടെ വാളിന്റെ ഘടനയെക്കുറിച്ചും അത് ഉപയോഗിച്ചിരുന്ന രീതികളെക്കുറിച്ചും കൂടുതൽ വിവരങ്ങൾ ലഭ്യമാക്കാനാണ് ഗവേഷകരുടെ തീരുമാനം.

നോർവേയിലെ ഹഡലാൻഡ് എന്ന മേഖലയിലാണ് ഈ വാൾ കണ്ടെത്തിയത്. ചരിത്രപരമായി വളരെ വലിയ പ്രാധാന്യമുള്ള പ്രദേശമാണിത്. വളക്കൂറുള്ള മണ്ണ്, പുരാതന കൃഷിയിടങ്ങൾ, ശവകുടീരങ്ങൾ, അയൺ ഏജ് കാലഘട്ടത്തിലെ അവശിഷ്ടങ്ങൾ എന്നിവ കൊണ്ട് സമ്പന്നമായതിനാൽ ഈ പ്രദേശം പുരാവസ്തു ഗവേഷകരുടെ സ്ഥിരം സങ്കേതമാണ്.

ഒരു സാധാരണ സ്കൂൾ യാത്രക്കിടെ ഇത്രയും അപൂർവ്വമായ ഒരു ചരിത്ര വസ്തു കണ്ടെത്താൻ കഴിഞ്ഞ ഹെൻറിക്കിനെ ഗവേഷകർ അഭിനന്ദിച്ചു. ഈ വാൾ അക്കാലത്തെ ഒരു യോദ്ധാവിന്റേതോ, അതല്ലെങ്കിൽ ഉയർന്ന പദവിയുള്ള ഒരു കർഷകന്റേതോ ആകാം എന്നാണ് പ്രാഥമിക നിഗമനം. നോർവേയിൽ ഇത്തരമൊരു കണ്ടെത്തൽ നടക്കുന്നത് ആദ്യമല്ല. 2018ൽ സ്വീഡനിലെ ഒരു തടാകത്തിൽ നീന്തുമ്പോൾ എട്ടു വയസ്സുകാരനായ ഒരു ബാലൻ 1,500 വർഷം പഴക്കമുള്ള പ്രീ-വൈക്കിങ് വാൾ കണ്ടെത്തിയത് വലിയ വാർത്തയായിരുന്നു. ഹെൻറിക്കിന്റെ ഈ കണ്ടെത്തൽ ആ ചരിത്രതുടർച്ചയിലെ പുതിയ അധ്യായമായി മാറുകയാണ്.