മലയാളി താരം സി.പി റിസ്​വാൻ അന്താരാഷ്ട്ര ക്രിക്കറ്റിൽ നിന്ന് വിരമിച്ചു

ദുബൈ: യു.എ.ഇ ദേശീയ ക്രിക്കറ്റ്​ ടീം മുൻ ക്യാപ്​റ്റനും മലയാളിയുമായ സി.പി. റിസ്​വാൻ അന്താരാഷ്ട്ര ക്രിക്കറ്റിൽ നിന്ന്​ വിരമിച്ചു. ​ചൊവ്വാഴ്ച സമൂഹ മാധ്യമത്തിലൂടെയായിരുന്നു​ വിരമിക്കൽ പ്രഖ്യാപനം​. യു.എ.ഇ ദേശീയ ടീമിന്​ വേണ്ടി അന്താരാഷ്ട്ര ക്രിക്കറ്റിൽ സെഞ്ച്വറി നേടിയ ആദ്യ മലയാളിയാണ്. 2019 മുതൽ യു.എ.ഇ ദേശീയ ടീമിന്‍റെ ഭാഗമായിരുന്നു.

2020 ജനുവരി എട്ടിന്​ അബൂദബി ശൈഖ്​ സായിദ്​ സ്​റ്റേഡിയത്തിൽ അയർലന്‍റിനെതിരെ നടന്ന ഏകദിന മത്സരത്തിലായിരുന്നു റിസ്​വാന്‍റെ​ ആദ്യ സ്വഞ്ചറി. 136 പന്തിൽ നിന്ന്​ 109 റൺസ്​ നേടിയ റിസ്​വാന്‍റെ പ്രകടനം അന്ന്​ ലോക ശ്രദ്ധപിടിച്ചുപറ്റിയിരുന്നു.​ കേരള ക്രിക്കറ്റിന്‍റെ ഈറ്റില്ലമായി അറിയപ്പെടുന്ന തലശ്ശേരിയിൽ നിന്നാണ്​ സി.പി. റിസ്​വാൻ​ യു.എ.ഇ ദേശീയ ടീമിൽ ഇടം നേടുന്നത്​.​

2019ൽ നേപ്പാളിനെതിരെയായിരുന്നു ഏകദിനത്തിലെ അരങ്ങേറ്റം. ആ വർഷം നടന്ന ട്വന്‍റി20യിലും വരവറിയിച്ചു. 42 ഏകദിനങ്ങളിലായി 948 റൺസ്​ റിസ്​വാൻ 18 ട്വന്‍റി-20 മത്സരങ്ങളിൽ നിന്ന്​ 323 റൺസും സ്വന്തമാക്കി. നിലവിൽ എമിറേറ്റ്​സ്​ എയർലൈനിൽ ഉദ്യോഗസ്ഥനാണ്​ റിസ്​വാൻ. തലശേരി സ്വദേശി അബ്​ദുറഊഫിന്‍റെയും നസ്രീൻ റഊഫിന്‍റെയും മകനാണ്​. ഫാത്തിമ അനസാണ് ഭാര്യ. നൂറ റഊഫ്​, വഫ റഊഫ് എന്നിവർ സഹോദരിമാരാണ്. കുടുംബസമേതം യു.എ.ഇയിൽ ആണ്​ താമസം.

യു.എ.ഇയെ പ്രതിനിധീകരിച്ച്​ കളിക്കാൻ അവസരം ലഭിച്ചതിൽ ആദ്യം ദൈവത്തിന്​ നന്ദി പറയുന്നതായി റിസ്​വാൻ സമൂഹമാധ്യമത്തിൽ കുറിച്ചു. ക്രിക്കറ്റ്​ കരിയറിൽ ഉന്നതി​യിലെത്താൻ തനിക്ക്​ എല്ലാ പിന്തുണയും നൽകിയ കോച്ചുമാർ, ക്യാപ്​റ്റൻമാർ, യു.എ.ഇ ക്രിക്കറ്റ്​ ബോർഡ്​, കുടുംബാംഗങ്ങൾ തുടങ്ങിയവർക്ക്​ ഹൃദയത്തിൽ തൊട്ട് നന്ദി അറിയിക്കുന്നതായും റിസ്​വാൻ പറഞ്ഞു.