ഐ.എസ്​.എൽ; നൈസാമി​െൻറ പൈതൃകം കാക്കാൻ ഹൈദരാബാദ്​

പഴയ പുണെ എഫ്​.സിയാണ്​ നൈസാമി​െൻറ നാട്ടുകാരായി ഹൈദരാബാദ്​ എഫ്​.സി എന്ന പേരിൽ പുതിയ തട്ടകത്തിൽ അവതരിച്ചത്​. കഴിഞ്ഞ സീസണിലെ തുടക്കം പക്ഷേ, നിരാ​ശപ്പെടുത്തുന്നതായിരുന്നു. 18 മത്സരങ്ങളിൽ രണ്ട്​ ജയം മാത്രം നേടിയ ടീം അവസാന സ്​ഥാനക്കാരായി മടങ്ങി. പക്ഷേ, ഇക്കുറി അടിമുടി മാറ്റിപ്പണിതായിരുന്നു ടീമി​െൻറ ഒരുക്കം. ഇന്ത്യൻ ഫുട്​ബാളി​ൽ മികച്ച പരിചയസമ്പത്തുള്ള മുൻ ബംഗളൂരു എഫ്​.സി കോച്ച്​ ആൽബർ​േട്ടാ റോകയെ പരിശീലകനായി നിയമിച്ച്​ അവർ ഞെട്ടിച്ചു. പക്ഷേ, സ്​പാനിഷ്​ വമ്പന്മാരായ ബാഴ്​സലോണ അദ്ദേഹത്തെ തേടിയെത്തി​യതോടെ ഹൈദരാബാദ്​ റോകയെ മനസ്സില്ലാ മനസ്സോടെ ​വിട്ടുനൽകി. ഇപ്പോൾ, മറ്റൊര​ു റോക​ക്കു (മാനുവൽ റോക) കീഴിൽ ഒരുങ്ങുകയാണ്​ ​ ഹൈദരാബാദ്​.

ഇന്ത്യൻ താരങ്ങളും പുതുമുഖങ്ങളും വിദേശികളുമായി ശക്തമായൊരു ടീം കെട്ടിപ്പടുത്തു തന്നെ അവർ നൈസാമി​െൻറ നാട്ടുകാരുടെ ഫുട്​ബാൾ പാരമ്പര്യം കാക്കാൻ ഒരുങ്ങുന്നു.

യൂറോപ്യൻ സഹായം:

രണ്ട്​ യൂറോപ്യൻ ക്ലബുകളുമായി കൈകോർത്താണ്​ ഹൈദരാബാദ്​ ഇൗ സീസണിൽ ഇറങ്ങുന്നത്​. മുൻ ജർമൻ ചാമ്പ്യൻ ക്ലബ്​ ബൊറൂസിയ ഡോർട്​മുണ്ടാണ്​ അവരിൽ പ്രബലർ. ഗ്രാസ്​റൂട്ട്​ ഫുട്​ബാൾ, യൂത്ത്​ ഡെവലപ്​മെൻറ്​ എന്നിവയിൽ രണ്ടുവർഷത്തെ സഹകരണത്തിനാണ്​ ബൊറൂസിയയും ഹൈദരാബാദും ഒപ്പുവെച്ചത്​. അടിസ്​ഥാന സൗകര്യ വികസനത്തിനും കളിക്കാരുടെ പരിശീലനത്തിനുമായി കൈകോർക്കുന്നത്​ സ്​പാനിഷ്​ രണ്ടാം ഡിവിഷൻ ക്ലബ്​ മാർബേയ എഫ്​.സിയുമായാണ്​.

യൂത്ത്​ ഡിഫൻസ്​

ഏഴാം സീസൺ ​െഎ.എസ്​.എല്ലിൽ ഏറ്റവും യുവത്വമുള്ള പ്രതിരോധമാണ്​ ഹൈദരാബാദി​േൻറത്​. ശരാശരി 21.50 വയസ്സ്​. ആഷിഷ്​ റായ്​, സഹിൽ പൻവർ, ആകാശ്​ മിശ്ര, ചിൻഗ്ലൻസേന സിങ്​, ഡിംപ്​ൾ ഭഗത്​, നിഖിൽ പ്രഭു എന്നീ യുവതാരങ്ങൾക്കൊപ്പം, ഇന്ത്യൻ താരം ആദിൽ ഖാൻ, സൗവിക്​ ചക്രവർത്തി എന്നിവരടങ്ങിയ പരിചയസമ്പന്നർ കൂടി​ ചേരുന്ന പ്രതിരോധം.

ഫോറിൻ മുന്നേറ്റം

മുന്നേറ്റത്തിലാണ്​ വിദേശ മുതൽമുടക്ക്​. ആറ്​ വിദേശികളെ മാത്രമേ ടീമിൽ എത്തിച്ചുള്ളൂവെങ്കിലും, അവരിൽ മൂന്നും സ്​ട്രൈക്കർ റോളിലാണ്​. ഗോളടിക്കാൻ കേമനായ ആസ്​ട്രേലിയൻ ലീഗ്​ താരം ജോയൽ ചിയാനിസ്​, കഴിഞ്ഞ സീസണിൽ ഒഡിഷക്കായി ഒമ്പത്​ ഗോളടിച്ച സ്​പാനിഷ്​ സ്​ട്രൈക്കർ ആരിഡാനെ സൻറാന, മുൻ റേഞ്ചേഴ്​സ്​ താരം ഫ്രാൻസിസ്​കോ സൻഡാസ എന്നിവരാണ്​ ഗോളടിക്കാൻ ചുമതലപ്പെടുത്തിയവർ. ലിസ്​റ്റൺ കൊളാസോ, ഇഷൻ ഡേ എന്നീ ഇന്ത്യൻ യുവത്വവും കൂട്ടായുണ്ട്​.

മധ്യനിര മീഡിയം

ക്രിയേറ്റിവ്​ മിടുക്കുള്ള മധ്യനിരയില്ല എന്നതാണ്​ പ്രധാന വെല്ലുവിളി. മുൻ ബ്ലാസ്​റ്റേഴ്​സ്​ താരം ഹാളി ചരൺ നർസാരി, ഡിഫൻസിവ്​ മിഡിനും പാകമായി ആദിൽ ഖാൻ, നിഖിൽ പൂജാരി എന്നിവർക്കൊപ്പം ബ്രസീൽ താരം ജോ വിക്​ടർ, ലൂയിസ്​ സാസ്​ട്രേ എന്നീ വിദേശ താരങ്ങളാണ്​ മധ്യനിരയിലുള്ളത്​.

കോച്ച്​: മാനു​വൽ റോക​

​​െഎ.എസ്​.എൽ ബെസ്​റ്റ്​: പുണെ സിറ്റി എഫ്​ -സെമിഫൈനൽ 2017-18 (കഴിഞ്ഞ സീസൺ മുതൽ ഹൈദരാബാദ്)​

സ്​ക്വാഡ്​ ആവറേജ്​: 24.66 വയസ്സ്​

ടീം ഹൈദരാബാദ്​

ഗോൾകീപ്പർ: സുബ്രതാ പാൽ, ലക്ഷ്​മികാന്ത്​ കട്ടിമണി, മനാസ്​ ദുബെ, ലാൽബിയകുല ജോങ്​തെ.

പ്രതിരോധം: ആകാശ്​ മിശ്ര, ആഷിഷ്​ റായ്​, ചിൻഗ്ലൻസേന സിങ്​, ഡിംപിൾ ഭഗത്​, കിൻസയ്​ലാഗ്​ കോങ്​സിത്​, നിഖിൽ പ്രഭു, ഒഡയ്​ ഒനയ്​ഡിയ (സ്​പെയിൻ), സഹിൽ പൻവാർ

മധ്യനിര: അഭിഷേക്​ ഹാൾഡർ, ആദിൽ ഖാൻ, സഹിൽ തവോറ, ഹളിചരൺ നർസാരി, ഹിതേഷ്​ ശർമ, ജോ വിക്​ടർ (ബ്രസീൽ), ലാൽഡൻമാവിയ റാൽതേ, ലൂയിസ്​ സാസ്​​ത്രേ (സ്​പെയിൻ), മാർക്​ സൊതാൻപുയ, മുഹമ്മദ്​ യാസിർ, നിഖിൽ പൂജാരി, സൗവിക്​ ചക്രവർത്തി, സ്വീഡൻ ഫെർണാണ്ടസ്​.

ഫോർവേഡ്​: അറിഡെയ്​ൻ സാൻറാന (സ്​പെയിൻ), ഫ്രാൻസിസ്കോ സാൻഡസ (സ്​പെയിൻ), ഇഷാൻ ഡേ, ജോയൽ ചിയാനിസ് (ആസ്​ട്രേലിയ)​, ലാലാംപുയ, ലിസ്​റ്റൺ കൊളാസോ, രോഹിത്​ ഡാനു.