ഇന്ത്യന്‍ താരങ്ങള്‍ക്കായി ‘മിനി ഐ.പി.എല്‍’

മുംബൈ: ഇന്ത്യന്‍ താരങ്ങള്‍ക്കായി ആഭ്യന്തരതലത്തില്‍ ‘മിനി ഐ.പി.എല്‍’ രൂപത്തില്‍ പുതിയ ട്വന്‍റി20 ലീഗ് തുടങ്ങാന്‍ ബി.സി.സി.ഐ ആലോചിക്കുന്നു. വിവിധ സംസ്ഥാന അസോസിയേഷനുകളുടെ നേതൃത്വത്തില്‍ നടക്കുന്ന ട്വന്‍റി20 ലീഗുകള്‍ ഒരു നിരീക്ഷണ സംവിധാനത്തിന്‍െറ അഭാവത്തില്‍ ഒത്തുകളിക്കും മറ്റും വഴിയൊരുക്കുമെന്നും അത് ക്രിക്കറ്റിന് കൂടുതല്‍ ദോഷമുണ്ടാക്കുമെന്നും ഭയന്നാണ് പുതിയ ലീഗ് എന്ന ആശയം ബോര്‍ഡ് പരിഗണിക്കുന്നത്.
ഇന്ത്യന്‍ താരങ്ങളെ മാത്രം ഉദ്ദേശിച്ചുള്ള ഈ ലീഗ് ആഭ്യന്തര താരങ്ങള്‍ക്ക് തങ്ങളുടെ കഴിവ് പ്രകടിപ്പിക്കാന്‍ അവസരമൊരുക്കുന്നതിനൊപ്പം ഐ.പി.എല്‍ ഫ്രാഞ്ചൈസികളിലേക്ക് വഴിതുറന്നുകിട്ടാനും സഹായിക്കും. അവസാനിപ്പിച്ച ചാമ്പ്യന്‍സ് ലീഗ് ട്വന്‍റി20 നടക്കേണ്ടിയിരുന്ന സമയമായ സെപ്റ്റംബറില്‍ പുതിയ ടൂര്‍ണമെന്‍റ് നടത്താമെന്നാണ് ഉദ്ദേശിക്കുന്നത്. സയ്ദ് മുഷ്താഖ് അലി ട്വന്‍റി20 ട്രോഫിയുടെ നവീകരിച്ച രൂപമായും പുതിയ ടൂര്‍ണമെന്‍റ് നടത്താനാകും.
ഞായറാഴ്ച നടന്ന ബി.സി.സി.ഐ വര്‍ക്കിങ് കമ്മിറ്റി യോഗത്തില്‍ സെക്രട്ടറി അനുരാഗ് താക്കൂറാണ് ഈ ആശയം അവതരിപ്പിച്ചതെന്നാണ് റിപ്പോര്‍ട്ട്. നവംബര്‍ ഒമ്പതിന് നടക്കുന്ന എ.ജി.എമ്മില്‍ ഈ ആശയം ചര്‍ച്ചചെയ്യപ്പെടും.