വിരമിക്കൽ തീരുമാനത്തിൽ നിന്ന്​ പിൻമാറണമെന്ന്​ അർജൻറീന പ്രസിഡൻറ്​

ബ്യൂണസ് അയേഴ്​സ്​:അന്താരാഷ്​ട്ര ഫുട്​ബോളിൽ നിന്ന്​ വിരമിച്ച മെസിയോട്​ തീരുമാനത്തിൽ നിന്ന്​ പിൻമാറണമെന്ന്​ അർജൻറീന പ്രസിഡൻറ്​ മൗറികോ മക്രി.  ശതാബ്ദി കോപ്പയിലെ ഞെട്ടിക്കുന്ന തോല്‍വിയുടെ ഉത്തരവാദിത്തം ഏറ്റെടുത്തു അപ്രതീക്ഷിതമായി വിരമിക്കല്‍ പ്രഖ്യാപിച്ച ഫുട്‌ബോള്‍ രാജകുമാരനോട് തീരുമാനം പുനപരിശോധിക്കണമെന്ന് പ്രസിഡന്റ് ആവശ്യപ്പെട്ടു.

ഇൗ ആവശ്യമുന്നയിച്ച് പ്രസിഡൻറ്​ മെസിയുമായി സംസാരിച്ചു. ടെലിഫോണില്‍ മെസിയുമായി സംസാരിച്ച മക്രി  ദേശീയ ടീമിനൊപ്പം ഇനിയുമുണ്ടാവണമെന്നും വിരമിക്കല്‍ തീരുമാനം ഉപേക്ഷിക്കണമെന്നും ആവശ്യപ്പെട്ടു. രാജ്യമൊന്നടങ്കം മെസിയെ ഓര്‍ത്ത് അഭിമാനം കൊള്ളുന്നുവെന്നു പറഞ്ഞ മക്രി വിമര്‍ശകരുടെ നാവടപ്പിക്കാന്‍ ഇനിയും മെസി കളിക്കളത്തിലുണ്ടായേ മതിയാകൂ എന്നും പറഞ്ഞു.