പാട്ടുപെട്ടി

മൂലയിലിരിക്കുന്നു പാട്ടുപെട്ടി

ഏറെ നാളായ് തൊട്ടു നോക്കിയിട്ട്‌

* * *

ചിരിയുണ്ട്‌

കളിയുണ്ട്‌

മാളില്‍നിന്നും മാളിലേക്ക്

കത്തിക്കയറുന്നുണ്ട്‌

ഓരോ തുള്ളിയും രസിച്ച്‌

ചായകുടിയുണ്ട്‌

സാഹോദര്യത്തില്‍

സോമരസപാനവുമുണ്ട്

സ്നേഹോപചാരങ്ങള്‍

ഘോഷശബ്ദങ്ങള്‍

പിറന്നാള്‍ ആശംസകള്‍

പൊലിയുന്നുണ്ട്‌

നീ അല്ലെങ്കില്‍ മറ്റൊരാള്‍

എന്നെയോ, ആരെയോ തിരക്കി

ഞാന്‍, അ​െല്ലങ്കില്‍ അയാള്‍

‘താങ്ക്‌ യു’ ചൊല്ലി

‘ഹഗ്ഗു’ ചെയ്തു

വേറിട്ടു കേള്‍പ്പിക്കരുതൊരൊച്ചയും

ആര്‍ത്തുല്ലസിക്കരുത്

സന്തതി മരിച്ചാലും കരയരുത്‌

വന്നു കൂടുന്നവരോട്‌ മൊഴിയുക

ഒരംഗീകൃതശൈലി

കണ്‍പ്രകാശിപ്പിച്ചു നന്ദിപറയുക

മനുഷ്യനോ മനുഷ്യത്തിയോ അല്ല നീ

നീയൊരു മനോഹരവ്യവസ്ഥയുടെ കാവലാള്‍

വെറും ആള്‍ക്കൂട്ടശബ്ദം

മതി നിനക്കും

* * *

മൂലയിലിരിക്കുന്നു പാട്ടുപെട്ടി

കുടുങ്ങിയ ബഹിരാകാശചാരി

ഭൂമിയില്‍

മടങ്ങിയെത്തേണ്ടും വീടിന്‍

തരിവെട്ടംപോലെ

ചെറുതായ് മിന്നി

എഴുന്നേൽക്കണം

നടക്കണം

അടുത്തു ചെന്നതെടുത്ത്‌

വിടര്‍ത്തണം

സുഖമുള്ളൊരു

സ്വരൈക്യം പിടിച്ച്‌

പാടി നോക്കണം

നിന്നെ ഞാന്‍ വന്നു തൊടും

നാലഞ്ച് ഇതളുകള്‍