ഇരയെ പിടിക്കുന്നത് എങ്ങനെ?

ചാഞ്ഞും ചെരിഞ്ഞും ഇരയുടെ

ബലഹീനതകൾ ചികയണമാദ്യം

ഒറ്റപ്പെട്ട മീനുകളാണ്

ഉപയോഗശേഷം

വലിച്ചെറിയാനെളുപ്പം

പിന്നെ വേണ്ടത്

കൊളുത്തിന് മൂർച്ച കൂട്ടലാണ്

തേനൂറും വാക്കുകളോ

പ്രശംസയോ അഭികാമ്യം

എന്നിട്ടും വീണില്ലേൽ

പുതിയ വാഗ്ദാനങ്ങൾ ആവാം

അടുത്തതായി

കഴുത്തിന് പിറകിൽ

കൃത്യമായി

കൊളുത്തെറിയാൻ പരിശീലിക്കണം

കുടുങ്ങിക്കഴിഞ്ഞാലാദ്യമൊക്കെ

ഭക്ഷണം സ്നേഹത്തിൽ കുഴച്ച് നൽകി

വിശ്വാസ്യത കൂട്ടാം

രക്ഷകന്റെ പുനർജന്മമാണെന്ന്

ഇടക്കിടെ

ഓർമപ്പെടുത്തണം

സുഹൃദ് ബന്ധങ്ങൾ മുഴുവൻ

ഓരോന്നായി പൊട്ടിച്ചെറിഞ്ഞ്

ഇരയെ തീർത്തും ഒറ്റപ്പെടുത്തണം

ചോരയും നീരും

അവസാന ശ്വാസം വരെ വലിച്ചെടുക്കണം

മരണം ഉറപ്പു വരുത്തും മുമ്പ്

വലിച്ചെറിഞ്ഞേക്കണം

വലിച്ചെറിയും മുമ്പ്

പല്ലും നഖവും ഉപയോഗിച്ച്

പരമാവധി ആക്രമിക്കണം നീന്തിക്കര പറ്റാതിരിക്കാൻ

ചിറകുകളും

വാലും മുറിച്ചു കളയാനും

മറക്കണ്ട.