കാർലോസ്​ മെനം അന്തരിച്ചു

ബ്വേനസ്​​ എയ്​റിസ്​: അർജൻറീനയെ സംഭവബഹുലമായി നയിച്ച മുൻ പ്രസിഡൻറ്​ കാർലോസ്​ മെനം അന്തരിച്ചു. 90 വയസ്സായിരുന്നു. ഏറെക്കാലമായി ആരോഗ്യപ്രശ്​നങ്ങൾ നേരിട്ടുവന്ന കാർലോസി​‍െൻറ വിയോഗ വിവരം പ്രസിഡൻറ്​ ആൽബർ​ട്ടോ ഫെർണാണ്ടസാണ്​ ട്വിറ്ററി​ലൂടെ പുറത്തുവിട്ടത്​. സാമ്പത്തിക മുന്നേറ്റങ്ങളുടെ നായകനായി ഒരു കാലത്ത്​ വാഴ്​ത്തപ്പെട്ട ഇദ്ദേഹം 1989 മുതൽ പത്തു വർഷത്തെ ഭരണശേഷം അഴിമതികളുടെയും വിവാദങ്ങളുടെയും മാറാപ്പുകളുമായാണ്​ സ്​ഥാനമൊഴിഞ്ഞത്​. ഗൾഫിലേക്കും ബോസ്​നിയയിലേക്കും അർജൻറീനിയൻ സൈന്യത്തെ അയച്ചതും ക്രൊയേഷ്യയും എക്വഡോറുമായി ആയുധ ഇടപാട്​ നടത്തിയതും വിവാദമായി. ഭാര്യയെ ടി.വി കാമറക്ക്​ മുന്നിൽവെച്ച്​ പ്രസിഡൻറി​‍െൻറ കൊട്ടാരത്തിൽനിന്ന്​ ആട്ടിപ്പുറത്താക്കിയതും കുപ്രസിദ്ധിക്ക്​ വഴിവെച്ചു.

സിറിയയിൽനിന്ന്​ കുടിയേറിയ കുടുംബത്തിൽ പിറന്ന കാർലോസ്​ 1950കളിലാണ്​ പെറോണിസ്​റ്റ്​ പാർട്ടിയിൽ സജീവമാകുന്നത്. 1973 മുതൽ മൂന്നു വർഷം ലാ റിയോജ ഗവർണർപദം അലങ്കരിച്ച ഇദ്ദേഹം 76ലെ പട്ടാള അട്ടിമറിയെത്തുടർന്ന്​ പിടിയിലാവുകയും അഞ്ചു വർഷം തടവിൽ കഴിയുകയും ചെയ്​തു. ജയിൽമോചിതനായ ശേഷം തീപാറും പ്രസംഗങ്ങളിലൂടെ ജനപ്രിയനായി മാറി.

പ്രസിഡൻറ്​ പദവിയിലിരിക്കെ പൊതുമേഖലാ സ്​ഥാപനങ്ങൾ വിറ്റഴിക്കുന്നതുൾപ്പെടെ ഉദാരീകരണ നയങ്ങൾ വഴി അമേരിക്കയുടെയും അന്താരാഷ്​ട്ര ധനകാര്യ സ്​ഥാപനങ്ങളുടെയും കൈയടി നേടി. പിൽകാലത്ത്​ അഴിമതി, തൊഴിലില്ലായ്​മ തുടങ്ങിയ പ്രതിസന്ധികളിലേക്ക്​ രാജ്യത്തെ തള്ളിവിട്ടത്​ കാർലോസി​‍െൻറ ആലോചനരഹിതമായ നയങ്ങളാണെന്ന പഴികേട്ടു. അധികാരത്തിൽ തിരിച്ചെത്തണമെന്ന്​ അതിയായി മോഹിച്ചിരുന്നുവെങ്കിലും നിയമക്കുരുക്കുകൾമൂലം പിന്നീട്​ അത്​ അസാധ്യമാവുകയായിരുന്നു.