ലൈവ്​ റിപ്പോർട്ടിങിനിടെ മിസൈൽ സ്​ഫോടനം; പതറാതെ യുംന അൽ സെയ്​ദ്​

ജറൂസലം: ഗസ്സയിൽ സ്​ത്രീകളും കുട്ടികളും ഉൾപ്പെടെയുള്ള സാധാരണക്കാരെ ലക്ഷ്യമിട്ട്​ ഇ​സ്രായേൽ മനുഷ്യക്കുരുതി തുടരുന്നതിനിടെ, ഇതിന്‍റെ വാർത്തകൾ പുറംലോകത്തെത്തിക്കുന്നതിന്​ മാധ്യമപ്രവർത്തകർ നേരിടുന്ന വെല്ലുവിളികളും ചർച്ചയാകുന്നു. ജോലിക്കിടെ ഏത്​ നിമിഷവും ജീവൻ നഷ്​ടമാകുമെന്ന ഭീഷണി നേരിട്ടുകൊണ്ടാണ്​ വനിത മാധ്യമപ്രവർത്തകർ അടക്കമുള്ളവർ സംഘർഷമേഖലയിൽ ​ജോലി ചെയ്യുന്നത്​.

ഇസ്രായേലിന്‍റെ വ്യോമാക്രമണം രൂക്ഷമായ ഗസ്സയിലെ ഒരു കെട്ടിടത്തിന്‍റെ ടെറസിൽ നിന്ന്​ വാർത്ത ലൈവായി റിപ്പോർട്ട്​ ചെയ്യുന്നതിനിടെ മിസൈൽ സ്​ഫോടനമു​ണ്ടാകു​േമ്പാൾ പതറാതെ വിവരണം തുടരുന്ന വനിത മാധ്യമ പ്രവർത്തകയുടെ വിഡിയോ കയ്യടി നേടുകയാണ്​. അൽ ജസീറ ചാനലിന്‍റെ യുംന അൽ സെയ്​ദ്​ എന്ന മാധ്യമ പ്രവർത്തകയാണ്​ ജീവൻ പണയം വെച്ച്​ ജോലി തടസ്സമില്ലാതെ ചെയ്​തത്​.

തൊട്ടടുത്ത്​ മിസൈൽ സ്​​ഫോടനം ഉണ്ടായപ്പോൾ സുരക്ഷിത സ്​ഥാനത്തേക്ക്​ ഓടുന്നതിനിടയിലും യുംന ലൈവ്​ വിവരണം നിർത്തിയിരുന്നില്ല. 'എന്‍റെ ദൈവമേ, ഞാന്‍ താഴേക്ക് ഓടുകയാണ്. അതിഭയങ്കരമായ സ്ഫോടനമാണു നടന്നിരിക്കുന്നത്' എന്ന യുംനയുടെ വാക്കുകള്‍ക്കൊപ്പം സ്ഫോടനത്തിന്‍റെ ശബ്​ദവും കേൾക്കാം. തൊട്ടു പിന്നാലെ സ്​ഫോടനത്തിൽ തകർന്ന കെട്ടിടത്തിലേക്ക്​ ക്യാമറ നീങ്ങുന്നുണ്ട്​. കെട്ടിടം പൂര്‍ണമായി തകര്‍ന്നു. ഏഴുപേരോളമാണ്​ സ്ഫോടനത്തില്‍ കൊല്ലപ്പെട്ടത്​. സാധാരണ ദിവസങ്ങളില്‍ ഏറ്റവും തിരക്കേറുന്ന ജനവാസ കേന്ദ്രങ്ങളില്‍ ഒന്നിലാണ്​ ബുധനാ​​ഴ്ച സ്​ഫോടനം നടന്നത്​.

തിങ്കളാഴ്ച തുടങ്ങിയ ആക്രമണപരമ്പരയിൽ ആകെ കൊല്ലപ്പെട്ട ഫലസ്​തീനികളുടെ എണ്ണം 122 ആയി. ഇതിൽ 31 പേർ കുട്ടികളാണ്​. 900ത്തിലധികം പേർക്ക്​ പരിക്കേറ്റു. അതേസമയം, ഇസ്രായേലിനുനേരെ ഹമാസ്​ നടത്തിയ റോക്കറ്റ്​ ആക്രമണത്തിൽ കൊല്ലപ്പെട്ടവരുടെ എണ്ണം ഏഴായി.

വ്യോമാക്രമണത്തിന്​ പുറമെ കരസേന ആക്രമണത്തിനും​ ഇസ്രായേൽ സജ്ജമായി നിൽക്കുകയാണെന്നാണ്​ റിപ്പോർട്ടുകൾ. ആക്രമണം നിർത്തി സമാധാനാന്തരീക്ഷം പുനസ്​ഥാപിക്കണമെന്ന്​ ഐക്യരാഷ്ട്രസഭ മേധാവി അ​േന്‍റാണിയോ ഗുട്ടറസ് ഉൾപ്പെടെയുള്ളവർ ആഹ്വാനം ചെയ്​തിട്ടുണ്ട്​.