ബംഗ്ലാദേശിൽ പ്രതിപക്ഷ പ്രക്ഷോഭം ശക്തം; മുൻ ആഭ്യന്തര മന്ത്രി ഉൾപ്പെടെ നേതാക്കൾ ജയിലിൽ

ധാക്ക: ബംഗ്ലാദേശിൽ സർക്കാർ വിരുദ്ധ പ്രക്ഷോഭം നയിച്ച പ്രതിപക്ഷ നേതാക്കൾക്ക് ധാക്ക മെട്രോപൊളിറ്റൻകോടതി തടവുശിക്ഷ വിധിച്ചു. മുൻ ആഭ്യന്തര മന്ത്രിയും ബംഗ്ലാദേശ് നാഷനലിസ്റ്റ് പാർട്ടി വൈസ് ചെയർമാനുമായ അൽതാഫ് ഹുസൈൻ ചൗധരിയെ ജയിലിലയക്കാൻ ഞായറാഴ്ച കോടതി ഉത്തരവിട്ടു. കഴിഞ്ഞയാഴ്ച പ്രതിപക്ഷ പാർട്ടികൾ നടത്തിയ റാലിക്കിടെ പാർട്ടി അനുഭാവികളും പൊലീസും തമ്മിലുണ്ടായ ഏറ്റുമുട്ടലിനിടെ രണ്ടുപേർ മരിക്കുകയും ചീഫ് ജസ്റ്റിസിന്റെ വസതി തകർക്കുകയും ചെയ്ത സംഭവത്തിലാണ് നടപടി.

ബി.എൻ.പി സെക്രട്ടറി ജനറൽ മിർസ ഫക്റുൽ ഇസ്‍ലാം ആലംഗീറും രണ്ടാമത്തെ നേതാവും മു​ൻ വാ​ണി​ജ്യ മ​ന്ത്രിയുമായ അ​മീ​ർ ഖു​സ്റു മ​ഹ്മൂ​ദ് ചൗ​ധ​രിയും ഉൾപ്പെടെ 8,000ത്തോളം പ്രതിപക്ഷ നേതാക്കളും പ്രവർത്തകരും ജയിലിലാണുള്ളത്. രാജ്യത്ത് പ്രതിപക്ഷ പ്രക്ഷോഭം ശക്തമാണ്. സമരത്തെ അടിച്ചമർത്തുന്ന നിലപാടാണ് സർക്കാർ സ്വീകരിക്കുന്നത്.

പ്രതിപക്ഷം ആഹ്വാനം ചെയ്ത 48 മണിക്കൂർ രാജ്യവ്യാപക ഗതാഗത ഉപരോധത്തിനിടയിൽ പലയിടത്തും ഏറ്റുമുട്ടലുണ്ടായി. നിരവധി പൊലീസ് വാഹനങ്ങൾക്ക് തീവെച്ചു. ഒക്ടോബർ 28ന് ധാക്കയിൽ പ്രതിപക്ഷം ലക്ഷം പേരുടെ റാലി നടത്തി. ഇതോടനുബന്ധിച്ചുണ്ടായ അക്രമത്തിൽ ​പൊലീസുകാരൻ ഉൾപ്പെടെ രണ്ടുപേർ കൊല്ലപ്പെട്ടു. ചീഫ് ജസ്റ്റിസിന്റെ വസതി തകർക്കപ്പെടുകയും ചെയ്തു. ശൈ​ഖ് ഹ​സീ​ന സ​ർ​ക്കാ​ർ രാ​ജി​വെ​ച്ച് സു​താ​ര്യ​മാ​യ തെ​ര​ഞ്ഞെ​ടു​പ്പ് ന​ട​ത്ത​ണ​മെ​ന്നാ​ണ് പ്രതിപക്ഷത്തിന്റെ ആവശ്യം. രാ​ജി​യാ​വ​ശ്യം ത​ള്ളി​യ ഹ​സീ​ന ബി.എൻ.പിയുമായി ഒരു ഒത്തുതീർപ്പ് ചർച്ചക്കുമില്ലെന്നും സമരത്തെ അടിച്ചമർത്തുമെന്നും വ്യക്തമാക്കി.