മൂന്നാം കുട്ടി; സർക്കാർ നയം തള്ളി ചൈനീസ്​ ജനത

ബെയ്​ജിങ്​: രണ്ട്​കുട്ടി മാത്രമെന്ന നിയന്ത്രണം അവസാനിപ്പിച്ച്​ ദമ്പതികൾക്ക്​ മൂന്നുകുട്ടികൾ വരെയാകാമെന്ന ചൈനീസ്​ സർക്കാറി​െൻറ പുതിയ നയത്തോട്​ മുഖംതിരിച്ച്​ യുവാക്കൾ. കുട്ടികളെ വളർത്താനുള്ള ഭീമമായ ചെലവോർത്താണ്​ പലരും വിയോജിക്കുന്നത്​.

2016ൽ ചൈന ഒറ്റക്കുട്ടി നയം അവസാനിപ്പിച്ചപ്പോഴും ഭൂരിഭാഗത്തി​െൻറയും പ്രതികരണം ഇതേരീതിയിൽ തന്നെയായിരുന്നു. രണ്ടുകുട്ടികൾ തന്നെ അധികമാണെന്ന നിലപാടാണ്​ പലർക്കും. ഞങ്ങൾ ധനികരൊന്നുമല്ല, പോരാത്തതിന്​ വീട്ടിൽ ഇടവും കുറവാണ്​. അതിനാൽ ഒരു കുട്ടിയെ കൂടി ഉൾക്കൊള്ളാൻ കഴിയില്ല-രണ്ടുകുട്ടികളുടെ പിതാവായ 29കാരൻ യാങ്​ ഷെങ്​യി പ്രതികരിച്ചു. രണ്ടാ​മത്തെ കുട്ടിയുണ്ടായപ്പോൾ ആദ്യകുട്ടിയുടെ ആവശ്യങ്ങൾ ഗണ്യമായി വെട്ടിച്ചുരുക്കേണ്ടി വന്നു.

ചൈന മൂന്നുകുട്ടി നയം അവതരിപ്പിച്ചപ്പോൾ തൊട്ട്​ ഇനി മുതൽ മൂന്നു ഡെക്കർ കട്ടിലിന്​ ഡിസ്​കൗണ്ട്​ ലഭിക്കും എന്ന തരത്തിൽ സാമൂഹികമാധ്യമങ്ങളിൽ ട്രോളുകളുടെ ഒഴുക്കാണ്​. അതെസമയം, നിയമം ​അവതരിപ്പിക്കാൻ ചൈനീസ്​ സർക്കാർ സമയം വൈകിപ്പോയെന്നാണ്​ വിദഗ്​ധരുടെ അഭിപ്രായം. ഒറ്റക്കുട്ടി, അല്ലെങ്കിൽ കുട്ടികളില്ലാതിരിക്കുക-ഈ സാമൂഹിക ചട്ടക്കൂട്ടിലാണ്​ ചൈനീസ്​ ജനത ഇപ്പോൾ ജീവിക്കുന്നത്​. അതിനാൽ കുട്ടികളെ വളർത്താൻ സാമ്പത്തിക സഹായം, അവർക്ക്​ സൗജന്യ വിദ്യാഭ്യാസം, ഹൗസിങ്​ സബ്​സിഡി എന്നിവ കൂടി നൽകാൻ സർക്കാർ സന്നദ്ധമാകണമെന്നും വിസ്​കോൺസിൻ-മാഡിസൺ യൂനിവേഴ്​സിറ്റി സയൻറിസ്​റ്റ്​ യി ഫുക്​സിയൻ ചൂണ്ടിക്കാട്ടി.

തൊഴിലിടങ്ങളിലെ അസമത്വം ​ സ്​ത്രീകളെ കടുത്ത സമ്മർദ്ദത്തിലാക്കിയിരിക്കയാണ്​. തൊഴിൽ സമയം കഴിഞ്ഞ്​ വീട്ടിലെത്തി കുട്ടികളെ ​സംരക്ഷിക്കാൻ അവർക്ക്​ സമയം വേണ്ടത്രയില്ല. ശമ്പളത്തിന്​ ഒരാളെ വെക്കാമെന്ന്​ വിചാരിച്ചാൽ അതിനുള്ള സാമ്പത്തിക പ്രാപ്​തിയുമില്ല. കൂടുതൽ കുട്ടികളുണ്ടായാൽ ജോലി ചെയ്യാതെ അവരെയും നോക്കി വീട്ടിലിരിക്കേണ്ടി വരും-ഇതൊക്കെയാണ്​ സ്​ത്രീകളെ കൂടുതൽ കുട്ടികളെന്ന ആഗ്രഹത്തിൽ നിന്ന്​ പിന്തിരിപ്പിക്കുന്നത്​. ലോകത്ത്​ ഏറ്റവും കൂടുതൽ ജനസംഖ്യയുള്ള രാജ്യമാണ്​ ചൈന. ഈ മാസാദ്യമാണ്​ ജനനനിരക്കിൽ കുറവു കണ്ടതിനെ തുടർന്നും യുവാക്കളുടെ എണ്ണം കുറഞ്ഞതിനെ തുടർന്നും​ ദമ്പതികൾക്ക്​ മൂന്നുകുട്ടികൾ വരെയാകാമെന്ന നിയമം കൊണ്ടുവന്നത്​.