ജാ​തി​യേ​താ​യാ​ലും പ്ര​സി​ഡ​ന്റ് ന​ന്നാ​യാ​ൽ​ മ​തി

എ.​ഐ.​സി.​സി​യാ​യാ​ലും കെ.​പി.​സി.​സി ആ​യാ​ലും പ്ര​സി​ഡ​ന്റി​ന്റെ പ്ര​ധാ​ന​യോ​ഗ്യ​ത ആ​ദ​ർ​ശ​മാ​ണ്. ആ​ദ​ർ​ശ​വാ​നാ​യാ​ൽ പോ​രാ, ആ​ദ​ർ​ശ​ധീ​ര​നാ​ക​ണം. അ​ത്ത​രം ധീ​ര​ന്മാ​രു​ടെ ഒ​രു കു​ലം​ത​ന്നെ കോ​ൺ​ഗ്ര​സി​നു​ണ്ടാ​യി​രു​ന്ന​ല്ലോ. സി.​കെ. ഗോ​വി​ന്ദ​ൻ നാ​യ​ർ, എ.​കെ. ആ​ന്റ​ണി, വി.​എം. സു​ധീ​ര​ൻ മു​ത​ൽ​പേ​ർ. ആ​ദ​ർ​ശ​ത്തി​ന്റെ ആ​രോ​മ​ൽ​ച്ചേ​ക​വ​ന്മാ​ർ. എ​ണ്ണി​വ​രു​മ്പോ​ൾ, നാ​യ​ർ, ക​ത്തോ​ലി​ക്കാ, ഈ​ഴ​വ സ​മു​ദാ​യ​ത്തി​ന്റെ ലേ​ബ​ലാ​യി​രി​ക്കും ഏ​റെ​യും. ആ​ക​യാ​ൽ എ​ണ്ണ​ണ​മെ​ന്നി​ല്ല. ജാ​തി​യേ​താ​യാ​ലും പ്ര​സി​ഡ​ന്റ് ന​ന്നാ​യാ​ൽ​മ​തി.

എ​ന്നാ​ലും ഇ​ക്കാ​ല​ത്ത്, ഈ ​ന​വ​കേ​ര​ള​ത്തി​ൽ, ജാ​തി ഒ​രു അ​ധി​ക​യോ​ഗ്യ​ത​യാ​ണ്. ആ ​സ​ത്യം മ​റ​ച്ചു​വെ​ച്ചി​ട്ട് കാ​ര്യ​മി​ല്ല. കെ. ​സു​ധാ​ക​ര​നെ മാ​റ്റു​മെ​ന്ന് കേ​ട്ട​പ്പോ​ൾ ന​ടേ​ശ​ഗു​രു​ദേ​വ​ൻ ചോ​ദി​ച്ച​ത് ഓ​ർ​മ​യി​ല്ലേ, ‘‘സു​ധാ​ക​ര​നെ മാ​റ്റി​യി​ട്ട്, ഏ​ത് മൈ​ഗു​ണ​നെ​യാ​ണ് കൊ​ണ്ടു​വ​രു​ന്ന​ത്?’’ എ​ന്ന്.

ഏ​താ​യാ​ലും അ​വ​രി​പ്പോ​ൾ ഒ​രാ​ളെ കൊ​ണ്ടു​വ​ന്നു​ക​ഴി​ഞ്ഞു. ആ​ളെ ന​ടേ​ശ​ഗു​രു​വി​ന് ബോ​ധി​ച്ചി​ട്ടി​ല്ല. ആ​ൾ ക​ത്തോ​ലി​ക്ക​നാ​ണ്. മ​ധ്യ​തി​രു​വി​താം​കൂ​റി​ൽ വേ​രു​ക​ളു​ണ്ടെ​ങ്കി​ലും മ​ല​ബാ​റു​കാ​ര​നാ​ണ്. ആ​ദ​ർ​ശ​ധീ​ര​ന്മാ​രി​ൽ ഒ​തു​ങ്ങു​ന്നി​ല്ല പ്ര​സി​ഡ​ന്റു​കു​ലം. കു​മ്പ​ള​ത്തു ശ​ങ്കു​പി​ള്ള, വ​യ​ലാ​ർ ര​വി, കെ. ​മു​ര​ളീ​ധ​ര​ൻ തു​ട​ങ്ങി​യ വി​ല്ലാ​ളി​വീ​ര​ന്മാ​രും വ​ന്നു​പോ​യി​ട്ടു​ണ്ട്. ആ​ദ​ർ​ശ​ധീ​ര​നോ വി​ല്ലാ​ളി​വീ​ര​നോ?​ഇ​തി​ലേ​തി​ൽ​പെ​ടും സ​ണ്ണി ജോ​സ​ഫ് എ​ന്ന് പി​ടി​കി​ട്ടാ​ത്ത​തു​കൊ​ണ്ട് ഉ​റ​ക്കം​പോ​യ​വ​രും ഉ​ണ്ട്.

പ​ണ്ട്, എ​ന്നു​പ​റ​ഞ്ഞാ​ൽ 1959ൽ. ​മ​ന്ന​ത്ത​പ്പ​ൻ എ​ടു​ത്ത ഒ​രു പ്ര​തി​ജ്ഞ​യു​ണ്ട്. അ​റി​യാ​ലോ, തി​രു​മേ​നി​യു​ടെ ക​മ്യൂ​ണി​സ്റ്റ് ഭ​ര​ണ​ത്തി​ന്റെ കാ​ല​മാ​ണ്. ‘‘ഈ ​ക​മ്യൂ​ണി​സ്റ്റു​കാ​രെ കേ​ര​ള​ത്തി​ൽ​നി​ന്നു മാ​ത്ര​മ​ല്ല, ഇ​ന്ത്യ​യി​ൽ​നി​ന്നു​ത​ന്നെ ഭാ​ണ്ഡം​കെ​ട്ടി​ച്ച് അ​വ​രു​ടെ പി​തൃ​രാ​ജ്യ​മാ​യ റ​ഷ്യ​യി​ലേ​ക്ക് തു​ര​ത്തി​യ​തി​ന് ശേ​ഷ​മേ എ​ന്റെ ബു​ദ്ധി​ക്ക് മാ​ർ​ദ​വ​മു​ണ്ടാ​വു​ക​യു​ള്ളൂ​വെ​ന്ന് ഞാ​ൻ പ്ര​ഖ്യാ​പി​ച്ചു​കൊ​ള്ളു​ന്നു’’ എ​ന്നാ​യി​രു​ന്നു മ​ന്ന​പ്ര​തി​ജ്ഞ. ആ ​ലൈ​നി​ൽ​ത​ന്നെ​യാ​ണ് സു​ധാ​ക​രേ​ട്ട​നും പി​ടി​ച്ചി​ട്ടു​ള്ള​ത് എ​ന്ന് ധ​രി​ച്ചു​വെ​ച്ച പോ​രാ​ളി​ക​ൾ ഉ​ണ്ട​ല്ലോ. പി​ണ​റാ​യി​യെ വ​ലി​ച്ചു​താ​ഴെ​യി​ട്ട് സു​ധാ​ക​രേ​ട്ട​ൻ നെ​റ്റി​യി​ലെ വി​യ​ർ​പ്പ് ചൂ​ണ്ടു​വി​ര​ൽ​കൊ​ണ്ട് തു​ട​ച്ചെ​ടു​ക്കു​ന്ന രം​ഗം ശി​വാ​ജി​ഗ​ണേ​ശ​ന്റെ സി​നി​മ​യി​ലെ​ന്ന​പോ​ലെ ക​ണ്ടു​കൊ​ണ്ടി​രു​ന്ന ര​സി​ക​ർ​മ​ൻ​റം. അ​വ​രൊ​ക്കെ ആ​ശ​ങ്ക​യി​ലാ​ണ്. സ​ണ്ണി​യെ​ക്കൊ​ണ്ട് അ​ത്ര​ക്ക് ആ​കു​മോ എ​ന്ന എ​ക്ക​ച്ച​ക്ക​യി​ലാ​ണ്.

ആ ​ഫാ​ൻ​സ് അ​സോ​സി​യേ​ഷ​ൻ​കാ​രോ​ട് സ​ഹ​ത​പി​ക്കു​ക​യേ വ​ഴി​യു​ള്ളൂ. ഒ​രു പ്ര​സി​ഡ​ന്റി​ന് ആ​ത്യ​ന്തി​ക​മാ​യി ആ​രോ​ടാ​ണ് പൊ​രു​തേ​ണ്ടി​വ​രു​ന്ന​ത് എ​ന്ന് ആ​ലോ​ചി​ച്ചി​ട്ടി​ല്ലാ​ത്ത ശു​ദ്ധ​ന്മാ​രാ​ണ് കെ. ​സു​ധാ​ക​ര​നി​ൽ ശി​വാ​ജി​ഗ​ണേ​ശ​നെ കാ​ണു​ന്ന​ത്. എ​ന്നാ​ൽ, സ​ത്യം എ​ന്താ​ണ്? ആ​രാ​ണ് ഒ​രു കോ​ൺ​ഗ്ര​സ് പ്ര​സി​ഡ​ന്റി​ന്റെ വൈ​രി?

അ​ങ്ങേ​യ​റ്റം ദാ​ർ​ശ​നി​ക​മാ​യി സ​മീ​പി​ക്കേ​ണ്ട സ​മ​സ്യ​യാ​ണി​ത്. ജ​വ​ഹ​ർ​ലാ​ൽ നെ​ഹ്റു ഒ​ഴി​കെ​യു​ള്ള ഒ​രു​വി​ധ​പ്പെ​ട്ട കോ​ൺ​ഗ്ര​സ് നേ​താ​ക്ക​ളൊ​ക്കെ ഗീ​താ​വ്യാ​ഖ്യാ​നം എ​ഴു​തി​യി​ട്ടു​ള്ള​വ​രാ​ണ് എ​ന്നോ​ർ​ക്ക​ണം. എ​ഴു​തി​പ്പോ​കും. കോ​ൺ​ഗ്ര​സാ​ണ്. ഗാ​ന്ധി​ജി​യു​ടെ വ്യാ​ഖ്യാ​നം ‘അ​നാ​സ​ക്തി​യോ​ഗം’ മ​ല​യാ​ള​ത്തി​ലും കി​ട്ടാ​നു​ണ്ട്. വി.​ഡി. സ​തീ​ശ​നൊ​ക്കെ ഒ​ന്ന് നോ​ക്കി​വെ​ക്ക​ണം. ഗു​ണം​ചെ​യ്യും.

ഗാ​ന്ധി​ജി ക​ഴി​ഞ്ഞാ​ൽ​പി​ന്നെ കോ​ൺ​ഗ്ര​സി​ൽ അ​ത്ര​യും ത​ല​പ്പൊ​ക്ക​മു​ള്ളൊ​രു നേ​താ​വു​ണ്ടാ​യി​രു​ന്ന​ത് സ്വാ​ത​ന്ത്ര്യം കി​ട്ടി​യ കാ​ല​ത്തെ പാ​ർ​ട്ടി പ്ര​സി​ഡ​ന്റ് ആ​ചാ​ര്യ ജെ.​ബി. കൃ​പ​ലാ​നി​യാ​യി​രു​ന്നു. സ്വാ​ത​ന്ത്ര്യം കി​ട്ടി​യ​തോ​ടെ നെ​ഹ്റു പ്ര​ധാ​ന​മ​ന്ത്രി​യാ​യ​ല്ലോ. പ​ട്ടേ​ൽ ആ​ഭ്യ​ന്ത​ര​മ​ന്ത്രി​യാ​യി. ആ​സാ​ദ് വി​ദ്യാ​ഭ്യാ​സ മ​ന്ത്രി​യാ​യി. ചു​രു​ക്കി​പ്പ​റ​ഞ്ഞാ​ൽ, കോ​ൺ​ഗ്ര​സ് ഭ​ര​ണ​ക​ക്ഷി​യാ​യി. പി​ന്നെ ഏ​റെ​ക്കാ​ല​മൊ​ന്നും കൃ​പ​ലാ​നി​ജി കോ​ൺ​ഗ്ര​സ് പ്ര​സി​ഡ​ന്റാ​യി ഇ​രു​ന്നി​ട്ടി​ല്ല. രാ​ജി​യെ​ഴു​തി​ക്കൊ​ടു​ത്ത് ഇ​റ​ങ്ങി​പ്പോ​യി.

രാ​ജി​ക്ക​ത്തി​ൽ കാ​ര​ണ​വും പ​റ​ഞ്ഞി​രു​ന്നു: ഭ​ര​ണ​നേ​തൃ​ത്വ​ത്തി​ന്റെ സ്വ​ഭാ​വം. അ​വ​ർ കോ​ൺ​ഗ്ര​സ് പ്ര​സി​ഡ​ന്റി​നെ വി​ല​വെ​ക്കു​ന്നി​ല്ല. നെ​ഹ്റു​വാ​ണെ​ങ്കി​ലും പ​ട്ടേ​ലാ​ണെ​ങ്കി​ലും ന​യ​പ​ര​മാ​യ കാ​ര്യ​ങ്ങ​ൾ​പോ​ലും കോ​ൺ​ഗ്ര​സ് പ്ര​സി​ഡ​ന്റി​നോ​ട് ആ​ലോ​ചി​ക്കു​ന്നി​ല്ല. ഇ​ങ്ങ​നെ തു​ട​രു​ന്ന​തി​ൽ അ​ർ​ഥ​മി​ല്ല.

ഗാ​ന്ധി​ജി ര​ക്ത​സാ​ക്ഷി​യാ​യ ശേ​ഷ​മാ​യി​രു​ന്നു ഈ ​സ്ഥാ​ന​ത്യാ​ഗ​മെ​ന്ന​തി​നാ​ൽ രാ​ജി പി​ൻ​വ​ലി​പ്പി​ക്കാ​നും തു​ട​ര​ണ​മെ​ന്ന് നി​ർ​ബ​ന്ധി​ക്കാ​നും ആ​രും തു​നി​ഞ്ഞി​ല്ല. ഭ​ര​ണ​നേ​തൃ​ത്വം പു​തി​യ പാ​ർ​ട്ടി പ്ര​സി​ഡ​ന്റി​നെ തെ​ര​ഞ്ഞെ​ടു​ത്തു. പു​രു​ഷോ​ത്തം​ദാ​സ് ഠ​ണ്ഡ​ൻ.

കൃ​പ​ലാ​നി സ​ന്യ​സി​ക്കാ​നൊ​ന്നും പോ​യി​ല്ല. അ​ദ്ദേ​ഹം കി​സാ​ൻ മ​സ്ദൂ​ർ പ്ര​ജാ പാ​ർ​ട്ടി​യു​ണ്ടാ​ക്കി. ന​മ്മു​ടെ കേ​ര​ള​ഗാ​ന്ധി കേ​ള​പ്പ​ജി​യൊ​ക്കെ അ​തി​ൽ ചേ​ർ​ന്നു. അ​ങ്ങ​നെ​യാ​ണ് സ്വാ​ത​ന്ത്ര്യം കി​ട്ടി​യ​തി​ന് ശേ​ഷ​മു​ള്ള കോ​ൺ​ഗ്ര​സ് ച​രി​ത്രം പോ​കു​ന്ന​ത്. ഈ ​ച​രി​ത്ര​ത്തി​ലെ ഉ​ദ്വേ​ഗ​ജ​ന​ക​മാ​യ രം​ഗ​ങ്ങ​ൾ കൂ​ടു​ത​ൽ അ​ര​ങ്ങേ​റി​യി​ട്ടു​ള്ള​ത് കേ​ര​ള​ത്തി​ലാ​ണ്.

അ​തി​ലെ ഒാ​രോ രം​ഗ​ങ്ങ​ൾ, ഹോ! ​സം​സ്ഥാ​ന​ത്ത് ആ​ദ്യ​മാ​യി (അ​വ​സാ​ന​മാ​യും) കോ​ൺ​ഗ്ര​സി​ന്റെ ഏ​ക​ക​ക്ഷി ഭ​ര​ണം​വ​ന്ന​ത് 1962 സെ​പ്റ്റം​ബ​റി​ലാ​ണ​ല്ലോ. ഘ​ഡാ​ഘ​ഡി​യ​നാ​യ ആ​ർ. ശ​ങ്ക​റാ​ണ് മു​ഖ്യ​മ​ന്ത്രി. ഒ​രി​ഞ്ച് കു​റ​യാ​ത്ത പി.​ടി. ചാ​ക്കോ ആ​ഭ്യ​ന്ത​ര​മ​ന്ത്രി. കെ.​എ. ദാ​മോ​ദ​ര മേ​നോ​ന​ട​ക്കം ത​റ​വാ​ടി​ഗാ​ന്ധി​യ​ന്മാ​രു​മു​ള്ള മ​ന്ത്രി​സ​ഭ​യാ​ണ്. കെ.​പി.​സി.​സി അ​ധ്യ​ക്ഷ​നോ? സാ​ക്ഷാ​ൽ സി.​കെ. ഗോ​വി​ന്ദ​ൻ നാ​യ​ർ. പോ​രേ​പൂ​രം!

ഭ​ര​ണം തു​ട​ങ്ങി ഏ​റെ​ക്ക​ഴി​യും മു​മ്പേ അ​ഴി​മ​തി​യാ​രോ​പ​ണം വ​ന്നു. ഏ​തോ ഒ​രു ബ​ന്ധു​വി​ന് ക്ര​മം​തെ​റ്റി​ച്ച് ബെ​ൻ​സ് കാ​ർ കി​ട്ടാ​ൻ ശി​പാ​ർ​ശ ചെ​യ്തു എ​ന്ന് മു​ഖ്യ​മ​ന്ത്രി​ക്കെ​തി​രെ ആ​രോ​പ​ണം. ഭാ​ര്യ​യോ​ടൊ​പ്പം ആ​രെ​യോ സ​ന്ദ​ർ​ശി​ച്ച​പ്പോ​ൾ കി​ട്ടി​യ വൈ​ര​മാ​ല ഖ​ജ​നാ​വി​ൽ അ​ട​ക്കാ​തെ സ്വ​ന്ത​മാ​ക്കി​യെ​ന്ന് ദാ​മോ​ദ​ര മേ​നോ​നെ​തി​രെ ആ​രോ​പ​ണം. പ്ര​തി​പ​ക്ഷ​മാ​ണ് ആ​രോ​പ​ണം കൊ​ണ്ടു​വ​ന്ന​ത്. എ​ന്നാ​ൽ, ഇ​തി​ന്റെ സ​ത്യാ​വ​സ്ഥ അ​റി​യ​ണ​മെ​ന്ന് കെ.​പി.​സി.​സി യോ​ഗ​ത്തി​ൽ അ​തു​ന്ന​യി​ച്ച​ത് പ്ര​സി​ഡ​ന്റാ​ണ്. കെ.​പി.​സി.​സി പ്ര​സി​ഡ​ന്റു​ത​ന്നെ ഭ​ര​ണ​ത്തി​നെ​തി​രെ കു​പ്ര​ചാ​ര​ണം ന​ട​ത്തു​ന്ന​ത് ശ​രി​യോ എ​ന്ന് മ​ന്ത്രി​മാ​ർ ചോ​ദി​ച്ചു.

‘‘ഭ​ര​ണ​നേ​തൃ​ത്വ​ത്തെ സം​ഘ​ട​ന തി​രു​ത്തും’’ എ​ന്നാ​യി സി.​കെ.​ജി. അ​ന്ന് പി.​ടി. ചാ​ക്കോ ജൂ​ബാ​യു​ടെ കൈ ​തെ​റു​ത്തു ക​യ​റ്റി: ‘‘ക​ളി​ച്ചു​ക​ളി​ച്ച് ഒ​രു​ത്ത​നും നെ​ഞ്ച​ത്തു​ക​യ​റി ക​ളി​ക്കേ​ണ്ട. ഞ​ങ്ങ​ളും സം​ഘ​ട​ന കു​റെ ക​ണ്ടി​ട്ടു​ള്ള​താ.’’ ഒ​ടു​വി​ലെ​ന്താ​യി എ​ന്ന​ല്ലേ, ഏ​റെ​ത്താ​മ​സി​യാ​തെ സം​ഘ​ട​ന തെ​ര​ഞ്ഞെ​ടു​പ്പു വ​ന്നു. സം​ഘ​ട​ന വി​ഭാ​ഗം കെ.​പി. മാ​ധ​വ​ൻ നാ​യ​രെ സ്ഥാ​നാ​ർ​ഥി​യാ​ക്കി. മ​ന്ത്രി​സ​ഭ വി​ഭാ​ഗം എം.​സി. ചാ​ക്കോ​യെ നി​ർ​ത്തി. റി​ട്ടേ​ണി​ങ് ഓ​ഫി​സ​ർ ഉ​ത്ത​രേ​ന്ത്യ​യി​ൽ​നി​ന്നാ​യി​രു​ന്നു. മ​ത്സ​രം ക​ടു​ത്തു​വ​ന്ന​പ്പോ​ൾ ക​സേ​ര​ക​ളൊ​ക്കെ പ​റ​ന്നു​തു​ട​ങ്ങി. അ​ച്ച​ട​ക്കം പാ​ലി​ക്ക​ണ​മെ​ന്ന് അ​ഭ്യ​ർ​ഥി​ക്കാ​ൻ റി​ട്ടേ​ണി​ങ് ഓ​ഫി​സ​ർ എ​ഴു​ന്നേ​റ്റു. ഇ​രി​യെ​ടാ പ​ട്ടീ എ​ന്നാ​യി ഗാ​ന്ധി​യ​ന്മാ​ർ. ‘‘നോ​ട്ട് പ​ട്ടീ​ൽ, നോ​ട്ട് പ​ട്ടീ​ൽ, ഐ ​ആം കം​ബോ​ൽ​ജ ഹ​രി​ഹ​ര കം​ബോ​ൽ​ജ’’- റി​ട്ടേ​ണി​ങ് ഓ​ഫി​സ​ർ നി​ല​വി​ളി​ച്ചു. തെ​റി​യും ത​ല്ലും സ​ഹി​ക്കാം; പ​ക്ഷേ, ജാ​തി മാ​റി​പ്പോ​ക​രു​ത​ല്ലോ!

പ​റ​ഞ്ഞു​വ​ന്നി​ട​ത്തോ​ളം ച​രി​ത്ര​ത്തി​ൽ​നി​ന്ന് കാ​ര്യം പി​ടി​കി​ട്ടി​ക്കാ​ണു​മ​ല്ലോ. ആ​ദ​ർ​ശ​ധീ​ര​നാ​യ ഒ​രു പ്ര​സി​ഡ​ന്റി​ന്റെ വൈ​രി അ​ധി​കാ​ര​മാ​ണ്. അ​ധി​കാ​രം വ​രു​ന്ന​ത് നി​യ​മ​സ​ഭാ​ക​ക്ഷി വ​ഴി​യാ​ണ​ല്ലോ. ഭ​ര​ണ​മു​ണ്ടെ​ങ്കി​ലും ഇ​ല്ലെ​ങ്കി​ലും നി​യ​മ​സ​ഭാ​ക​ക്ഷി ലീ​ഡ​ർ​ക്ക് ഒ​രു കാ​ബി​ന​റ്റ് ഗ​മ​യു​ണ്ട​ല്ലോ. അ​ധി​കാ​ര​ത്തി​ന്റെ പ്ര​തി​രൂ​പ​മാ​ണ് ലീ​ഡ​ർ. ആ​ദ​ർ​ശ​ത്തി​ന്റെ ആ​ൾ​രൂ​പ​മാ​ണ് പ്ര​സി​ഡ​ന്റ്. അ​വി​ടെ​ത്തു​ട​ങ്ങു​ന്നു അ​ടി.

ഇ​ത് ഇ​പ്പോ​ഴൊ​ന്നും തു​ട​ങ്ങി​യ​ത​ല്ല. ഐ​ക്യ​കേ​ര​ളം വ​രും​മു​മ്പ് തി​രു-​കൊ​ച്ചി ഉ​ണ്ടാ​യ​ല്ലോ. 1949ൽ ​തി​രു​വി​താം​കൂ​ർ, കൊ​ച്ചി നി​യ​മ​സ​ഭ​ക​ൾ ല​യി​ച്ച് തി​രു​കൊ​ച്ചി ഉ​ണ്ടാ​യി. കൊ​ച്ചി​യി​ൽ​നി​ന്നു​ള്ള പ​ന​മ്പി​ള്ളി ഗോ​വി​ന്ദ മേ​നോ​ൻ, കെ.​പി. മാ​ധ​വ​ൻ നാ​യ​ർ തു​ട​ങ്ങി​യ​വ​രും തി​രു​വി​താം​കൂ​റി​ൽ​നി​ന്നു​ള്ള കു​മ്പ​ള​ത്തു ശ​ങ്കു​പ്പി​ള്ള, ഐ.​ജെ. ജോ​ൺ തു​ട​ങ്ങി​യ​വ​രു​മൊ​ക്കെ ചേ​ർ​ന്ന​പ്പോ​ൾ കോ​ൺ​ഗ്ര​സ് മ​ഹാ പ്ര​സ്ഥാ​ന​മാ​യി.

അ​ങ്ങ​നെ​യി​രി​ക്കെ പ​ന​മ്പി​ള്ളി ഗോ​വി​ന്ദ മേ​നോ​ൻ തി​രു-​കൊ​ച്ചി പ്ര​ധാ​ന​മ​ന്ത്രി​യാ​യി(​അ​ന്ന് അ​ങ്ങ​നെ​യാ​ണ് പ​റ​യു​ക. മു​ഖ്യ​ന​ല്ല). കു​മ്പ​ള​ത്തു ശ​ങ്കു​പ്പി​ള്ള​യാ​ണ് കെ.​പി.​സി.​സി പ്ര​സി​ഡ​ന്റ്. ഇ​വി​ടെ ഒ​രു കാ​ര്യം ഓ​ർ​ത്തു​വെ​ക്ക​ണം, കു​മ്പ​ള​ത്തു ശ​ങ്കു​പ്പി​ള്ള​ച്ചേ​ട്ട​ൻ ഒ​ന്നൊ​ഴി​കെ എ​ല്ലാ കാ​ര്യ​ത്തി​ലും ന​മ്മു​ടെ കെ. ​സു​ധാ​ക​ര​ന്റെ ത​നി​പ്പ​ക​ർ​പ്പാ​ണ്. അ​ടി​യെ​ങ്കി​ൽ അ​ടി, ത​ട​യെ​ങ്കി​ൽ ത​ട. ആ​ൾ മ​ന്ന​ത്ത​പ്പ​ന്റെ ആ​ളാ​ണ് എ​ന്നൊ​രു വ്യ​ത്യാ​സ​മേ​യു​ള്ളൂ. ന​മ്മു​ടെ കെ.​സി. വേ​ണു​ഗോ​പാ​ലി​ന് ഒ​ത്തൊ​രു ദേ​ശീ​യ നേ​താ​വ് അ​ന്നു​മു​ണ്ട്. കെ.​പി. മാ​ധ​വ​ൻ നാ​യ​ർ. സം​ഘ​ട​ന ചു​മ​ത​ല​യു​ള്ള എ.​ഐ.​സി.​സി സെ​ക്ര​ട്ട​റി​യാ​ണ്. അ​തി​നി​ടെ സം​ഘ​ട​ന തെ​ര​ഞ്ഞെ​ടു​പ്പു​വ​ന്നു. പ​ന​മ്പി​ള്ളി -മാ​ധ​വ​ൻ നാ​യ​ർ സം​ഘം കു​മ്പ​ള​ത്തെ മ​ത്സ​ര​ത്തി​ൽ തോ​ൽ​പി​ച്ചു. എ.​പി. ഉ​ദ​യ​ഭാ​നു​വി​നെ കെ.​പി.​സി.​സി പ്ര​സി​ഡ​ന്റാ​ക്കി.

ശ​ങ്കു​പ്പി​ള്ള​ച്ചേ​ട്ട​ൻ അ​ത​ത്ര കാ​ര്യ​മാ​യി എ​ടു​ത്തി​ല്ല. തെ​ര​ഞ്ഞെ​ടു​പ്പി​ൽ തോ​റ്റ​ത​ല്ലേ, അ​ങ്ങ​നെ​യേ എ​ടു​ത്തു​ള്ളൂ. ഒ​ന്നു​ര​ണ്ടാ​ഴ്ച ക​ഴി​ഞ്ഞ​പ്പോ​ൾ പ​ന​മ്പി​ള്ളി​യും അ​ദ്ദേ​ഹ​ത്തി​ന്റെ സ​ഹ മ​ന്ത്രി​യാ​യ എ.​എ. റ​ഹീ​മും​കൂ​ടി കൊ​ട്ടാ​ര​ക്ക​ര​യ്ക്ക​ടു​ത്ത് ഒ​രു ക​ല്യാ​ണ​വീ​ട്ടി​ൽ വെ​ച്ച് മു​ഖാ​മു​ഖം ചെ​ന്നു. അ​ത്ര പ​ന്തി​യി​ല്ലെ​ന്നു ക​ണ്ട് ശ​ങ്കു​പ്പി​ള്ള​ച്ചേ​ട്ട​ൻ ഒ​ഴി​ഞ്ഞു​മാ​റി. നേ​രേ പ​ന്മ​ന ആ​ശ്ര​മ​ത്തി​ൽ ചെ​ന്നു​ക​യ​റി. അ​വ​രു​ണ്ട് അ​വി​ടെ​യും ചെ​ല്ലു​ന്നു. എ​ന്നി​ട്ടൊ​രു ആ​ശ്വ​സി​പ്പി​ക്ക​ലും. തെ​ര​ഞ്ഞെ​ടു​പ്പ​ല്ലേ ചേ​ട്ടാ, അ​തൊ​ന്നും കാ​ര്യ​മാ​ക്ക​ണ്ടാ എ​ന്നൊ​രു ആ​ണി​കൂ​ടി. അ​ത് ത​റ​ച്ച​പ്പോ​ൾ വേ​ദ​നി​ച്ച കു​മ്പ​ളം പ​റ​ഞ്ഞു: ‘‘നി​യ​മ​സ​ഭ കൂ​ട​ട്ടെ, ആ​രാ​ണ് തോ​ൽ​ക്കു​ന്ന​ത് എ​ന്ന് അ​പ്പോ കാ​ണാം!’’

അ​ത് പ​ന​മ്പി​ള്ളി​ക്ക് കൊ​ണ്ടു. നി​യ​മ​സ​ഭാ പാ​ർ​ട്ടി​യി​ൽ ഭൂ​രി​പ​ക്ഷം തി​രു​വി​താം​കൂ​റു​കാ​രാ​ണ്. അ​തി​ൽ​ത​ന്നെ കു​മ്പ​ള​ത്തി​ന്റെ മേ​ജ​ർ​സെ​റ്റ് മു​ഴു​വ​നു​ണ്ട്. പ​ന​മ്പി​ള്ളി പെ​രു​ന്ന​യി​ലേ​ക്ക് പ​റ​പ്പി​ച്ചു. മ​ന്ന​ത്തെ ക​ണ്ട് കാ​ലു പി​ടി​ച്ചു. മ​ന്നം വ​ന്ന് കു​മ്പ​ള​ത്തെ സ​മാ​ധാ​നി​പ്പി​ച്ചു. പ​റ​ഞ്ഞ​തി​താ​ണ്: ‘‘പ​ന​മ്പി​ള്ളി​യും ഒ​രു നാ​യ​ര​ല്ലേ, ഇ​രി​ക്ക​ട്ടെ.’’

അ​തു​കേ​ട്ട് കു​മ്പ​ളം പൊ​ടി​ക്കൊ​ന്ന് അ​ട​ങ്ങി. പ​ക്ഷേ, ത​ക്കം കി​ട്ടി​യ​പ്പോ​ൾ ക​ളി​ച്ചു. ഇ​ത്ത​വ​ണ മ​ന്നം കൂ​ടെ​നി​ന്നു. രാ​ജി​വെ​ക്ക​ണ​മെ​ന്ന് ആ​റേ​ഴ് എം.​എ​ൽ.​എ​മാ​ർ ഒ​പ്പി​ട്ട ക​ത്ത് പ​ന​മ്പി​ള്ളി​ക്ക് കൊ​ടു​ത്തു. രാ​ജി​വെ​ക്കേ​ണ്ടി​വ​ന്നു. ഒ​പ്പു സം​ഘ​ടി​പ്പി​ച്ച കു​മ്പ​ള​ത്തി​നും ഒ​പ്പി​ട്ട എം.​എ​ൽ.​എ​മാ​ർ​ക്കും ഒ​പ്പി​യാ​ന്മാ​ർ എ​ന്നു​പേ​രാ​യി.

ഒ​പ്പി​യാ​ന്മാ​രാ​യ എം.​എ​ൽ.​എ​മാ​രേ​യും നേ​താ​വാ​യ കു​മ്പ​ള​ത്തേ​യും പാ​ർ​ട്ടി സ​സ്പെ​ൻ​ഡ് ചെ​യ്തു. ക​ളി ക​ള​ത്തി​ന് പു​റ​ത്തേ​ക്കാ​ണ് എ​ന്ന് ക​ണ്ട​പ്പോ​ൾ മ​ധ്യ​സ്ഥ​ന്മാ​ർ ഇ​റ​ങ്ങി. കു​മ്പ​ളം കോ​ൺ​ഗ്ര​സി​ന് പു​റ​ത്തു​പോ​കു​ന്ന​ത് ശ​രി​യ​ല്ല എ​ന്ന് അ​വ​ർ ഹൈ​ക​മാ​ൻ​ഡി​നെ ധ​രി​പ്പി​ച്ചു. പ​ശ്ചാ​ത്താ​പം പ്ര​ക​ടി​പ്പി​ക്കു​ന്ന​താ​യി എ​ഴു​തി​ക്കൊ​ടു​ത്താ​ൽ ന​ട​പ​ടി​ക​ൾ പി​ൻ​വ​ലി​ക്കാ​മെ​ന്ന് എ.​ഐ.​സി.​സി പ്ര​സി​ഡ​ന്റ് യു.​എ​ൻ ധേ​ബാ​ർ ഉ​റ​പ്പു​ന​ൽ​കി. അ​തു​പ്ര​കാ​രം കു​മ്പ​ളം ക​ത്തെ​ഴു​തി. അ​പ്പോ​ൾ കെ. ​മാ​ധ​വ​ൻ നാ​യ​ർ ഇ​ട​പെ​ട്ടു. വാ​ച​ക​ങ്ങ​ൾ മാ​റ്റി​യെ​ഴു​ത​ണ​മെ​ന്നാ​യി. മാ​ധ​വ​ൻ നാ​യ​രെ സു​ഖി​പ്പി​ക്കാ​നാ​യി മാ​റ്റി​യെ​ഴു​തി​ല്ല എ​ന്നാ​യി കു​മ്പ​ളം.

എ​ന്തി​ന് പ​ര​ത്തി​പ്പ​റ​യ​ണം, കു​മ്പ​ള​ത്തു ശ​ങ്കു​പി​ള്ള​യും ഒ​പ്പി​യാ​ന്മാ​രും വേ​റൊ​രു പാ​ർ​ട്ടി​യ​ങ്ങ് പ​ട​ച്ചു. കേ​ര​ള പീ​പ്ൾ​സ് പാ​ർ​ട്ടി. കെ.​പി.​പി. അ​തെ​ന്താ​യി എ​ന്ന് അ​ധി​ക​മാ​രും രേ​ഖ​പ്പെ​ടു​ത്തി​ക്ക​ണ്ടി​ട്ടി​ല്ല. അ​ഞ്ചാ​റാ​ണ്ട് ക​ഴി​ഞ്ഞ​പ്പോ​ൾ പു​ളി​മൂ​ട്ടി​ലൊ​രു പ​ഴ​യ മാ​ളി​ക​ക്കെ​ട്ടി​ട​ത്തി​നു മു​ക​ളി​ൽ പ​ഴ​യൊ​രു ബോ​ർ​ഡ് തൂ​ങ്ങി​ക്കി​ട​ക്കു​ന്ന​തു ക​ണ്ടു എ​ന്നോ മ​റ്റോ ആ​രോ എ​ഴു​തി​യി​ട്ടു​ണ്ട്. അ​ത്ര​യേ ഉ​ണ്ടാ​യു​ള്ളൂ. കു​മ്പ​ള​ത്തു ശ​ങ്കു​പി​ള്ള​ച്ചേ​ട്ട​ന്റെ ഘ​ന​ഗം​ഭീ​ര​മാ​യ ആ​ത്മ​ക​ഥ​പോ​ലും കോ​ൺ​ഗ്ര​സു​കാ​ര​ല്ല പ്ര​സി​ദ്ധീ​ക​രി​ച്ച​ത്. പ്ര​ഭാ​ത് ബു​ക്ക് ഹൗ​സാ​ണ്.

ക​സേ​ര പോ​യി​ട്ടും പോ​കാ​ത്ത ക​ലി​യു​മാ​യി സു​ധാ​ക​രേ​ട്ട​ൻ ചീ​റ്റു​ന്ന​തു കാ​ണു​മ്പോ​ൾ ശ​ങ്കു​പ്പി​ള്ള​ച്ചേ​ട്ട​നെ ഓ​ർ​ത്തു​പോ​കു​ന്നു. അ​പ്പു​റ​ത്ത് പ​ന​മ്പി​ള്ളി​യെ​പ്പോ​ലെ കൊ​ച്ചി​ക്കാ​ര​നാ​യ നി​യ​മ​സ​ഭാ​ക​ക്ഷി നേ​താ​വു​ണ്ട്. കെ. ​മാ​ധ​വ​ൻ നാ​യ​രെ​പ്പോ​ലെ സം​ഘ​ട​നാ ചു​മ​ത​ല​യു​ള്ള എ.​ഐ.​സി.​സി ജ​ന​റ​ൽ സെ​ക്ര​ട്ട​റി​യു​ണ്ട്. അ​വ​രെ​യൊ​ന്നും വി​ല​വെ​ക്കാ​ത്ത സു​ധാ​ക​രേ​ട്ട​ന് പു​തി​യ ബു​ദ്ധി​യൊ​ന്നും തോ​ന്നാ​തി​രി​ക്ക​ട്ടെ എ​ന്ന് പ്രാ​ർ​ഥി​ക്കാ​നേ ന​മു​ക്ക് ക​ഴി​യൂ.