മെറാക്കി കഫേ [ Meraki cafe]

പ്രണയത്തി​ന്റെ നാൽക്കവലയിൽ

നിന്ന് ഇടത്തേയ്ക്കു

തിരിഞ്ഞാൽ ഒരു

ചായപ്പീടിക.

ഹൃദയത്തി​ന്റെ ഞരമ്പിലൊരു പിടപ്പ്.

ഡെറ്റോളിൽ മുക്കിത്തുടച്ചപോലെ

ജനലിനപ്പുറം സന്ധ്യ.

അയഞ്ഞും മുറുകിയും

പശ്ചാത്തലത്തിൽ

ജുഗൽബന്ദി...

ഇടമുറിയാത്ത

ബൈപ്പാസിൽ

മുഖമില്ലാത്ത ജനാവലി.

ഒരു മൊട്ടത്തലയൻ മേശ,

അപ്പുറവുമിപ്പുറവും

ഞാനും നീയും.

അവ​ന്റെ കണ്ണിലുടക്കിക്കിടന്ന

എനിക്കൊരു

നായയുടെ രൂപം.

ഇനിയും മുങ്ങിച്ചാവാതിരിക്കാൻ

അവ​ന്റെ വിരലിൽപ്പിടിച്ചു.

അവൻ അറിയാത്തപോലെ,

‘‘എനിക്കൊരു കാശ്‌മീരിയൻ കവാഹ്’’

കൗമാരത്തിൽ പിടിച്ച എ​ന്റെ

പ്രേമപ്പനിയെ തണുപ്പിച്ചുകൊണ്ട് ഞാൻ,

എനിക്കൊരു ബെൽജിയം ചോക്ലേറ്റ് കോഫി...

ആവിപറന്ന ചൂടിൽ

ചുണ്ടുകളെ പൊള്ളിച്ച

കവാഹ്

ഓർമയുടെ കണ്ണ് നീറ്റി.

അവനെ കുടിച്ചുവറ്റിച്ച

ബെൽജിയം ചോക്ലേറ്റി​ന്റെ കറ

ഒരിക്കലും ഒന്നിക്കാഞ്ഞ

ഭൂപടത്തെ പശതേച്ചൊട്ടിച്ചു.

സമയത്തി​ന്റെ കത്തി താഴ്ന്നിറങ്ങുന്നു.

ഇനി പോകാം.

രണ്ടുവഴിയിൽ രണ്ട് അപരിചിതർ.