കൊയിലാണ്ടി: കൊല്ലം ശ്രീ പിഷാരികാവ് ക്ഷേത്രം ട്രസ്റ്റി ബോര്‍ഡ് ചെയര്‍മാനും സാംസ്‌കാരിക പ്രവര്‍ത്തകനും ചില്ല’ സാംസ്‌കാരിക മാസികയുടെ പത്രാധിപരുമായ കൊല്ലം ശാന്തി സദനില്‍ ഇളയിടത്ത് വേണുഗോപാല്‍ (82) നിര്യാതനായി. കേരള മദ്യവര്‍ജന സമിതി സംസ്ഥാന പ്രസിഡന്റ്, ശാന്തിസേനാ കൗണ്‍സില്‍ സംസ്ഥാന ചെയര്‍മാന്‍, സ്വാമി വിവേകാനന്ദ ഇന്‍സ്റ്റിറ്റ്യൂട്ട് ഓഫ് കള്‍ച്ചര്‍ അംഗം എന്നീ നിലകളില്‍ പ്രവര്‍ത്തിച്ചിരുന്നു. മദ്യത്തിനും ലഹരി പദാര്‍ഥങ്ങള്‍ക്കുമെതിരെയുള്ള പ്രവര്‍ത്തനങ്ങളിൽ ദേശീയ ശ്രദ്ധനേടിയിരുന്നു.
ജയപ്രകാശ് നാരായണുമൊത്ത് ബംഗ്ലാദേശില്‍ സമാധാന പ്രവര്‍ത്തനത്തിലും അഭയാര്‍ഥി പുനരധിവാസ ക്യാമ്പിലും പ്രവര്‍ത്തിച്ചു. ബംഗ്ലാദേശ് അഭയാര്‍ഥികള്‍ക്കായി ദിഗ്‌ബേരിയ ക്യാമ്പില്‍ ചെയ്ത സേവനത്തിന് പ്രധാനമന്ത്രി ഇന്ദിര ഗാന്ധിയുടെ ബഹുമതിപത്രം വേണുഗോപാലിന് ലഭിച്ചിട്ടുണ്ട്. തീക്കനല്‍പ്പാതയിലൂടെ ഒരു യാത്രയാണ്’ പ്രധാന കൃതി. ഭാഷാ സമന്വയവേദി അവാര്‍ഡ്, കേരള മഹാത്മജി സാംസ്‌കാരികവേദി അവാര്‍ഡ് എന്നിവ നേടി. താമരക്കുളത്തില്‍ കുഞ്ഞിരാമന്‍ നായരുടെയും കൊല്ലം ഇളയിടത്ത് ശ്രീദേവിക്കുട്ടി അമ്മയുടെയും മകനാണ്. ഭാര്യ: ജലജ. മക്കള്‍: ശാന്തി വിനോദ്കുമാര്‍, പ്രശാന്ത് വേണുഗോപാല്‍.
